विदेशी खेलाडी फुफानाको ह्याट्रिक मद्धतमा नवलपरासी ११ ले चोरमारामा जारी प्रथम मध्यविन्दु कप फुटबल प्रतियोगितामा शानदार विजयी सुरुवात गरेको छ ।
मंगलबार भएको खेलमा भेडाबारीलाई ६–० गोलको फराकिले अन्तरले पराजित गर्दै नवलपरासी ११ ले विजयी सुरुवात गरेको हो । पहिलो हाफको नवौँ मिनेटमा विदेशी खेलाडी फुफानाले गोल गर्दै टिमलाई १–० को अग्रता दिलाए । पहिलो हाफमा १–० को अग्रता कायम गरेको नवलपरासीले दोस्रो हाफमा थप ५ गोल गर्न सफल भयो । दोस्रो हाफको ८ औँ मिनेटमा आकाश थापाले गोल गर्दै टिमको अग्रता दोब्बर बनाए ।
त्यसको तीन मिनेटपछि ११ औँ मिनेटमा पुनः फुफानाले गोल गर्दे टिमको अग्रता तेब्बर बनाए । २४ औँ मिनेटमा विनोद कुुँवरले गोल गर्दै नवलपरासीलाई ४–० को अग्रता दिलाउन सफल भए । लगत्तै २६ औँ मिनेटमा फुफानाले ह्याट्रिक पुरा गर्दै टिमलाई ५–० को अग्रता दिलाए । फेरी २८ औँ मिनेटमा विनोद कुँवरले व्यक्तिगत दोस्रो गोल गर्दै टिमलाई ६–० को जित दिलाए । सो खेलको म्यान अफ दि म्याच ह्याट्रिक गरेका विदेशी खेलाडी फुफाना घोषित भए । प्रतियोगिता अन्तरगत आज (मंगलबार) भैरब स्पोर्टस् क्लब गोपीगञ्ज पश्चिम नवलपरासी र दुम्कीबास ११ बीच प्रतिस्पर्धा हुने खेल संयोजक चक्रबन्धु अधिकारीले जानकारी दिए । प्रतियोगितामा १४ टिमको सहभागिता रहेको छ ।
प्रतियोगिताको उपाधि विजेताले २ लाख २२ हजार २ सय २२ रुपैयाँ नगदसहित शिल्ड, मेडल र प्रमाण प्रत्र प्राप्त गर्ने छ भने दोस्रो हुने टिमले १ लाख ११ हजार १ सय ११ रुपैयाँ नगदसहित शिल्ड, मेडल र प्रमाण प्रत्र प्राप्त गर्नेछ । त्यसैगरि सेमीफाइनलबाट बाहिरिने दुइ टिमका लागि १५/१५ हजार, उत्कृष्ट खेलाडीलाई १० हजार र सर्वाधिक गोलकर्तालाई ७ हजार नगद पुरस्कार दिइने आर्थिक संयोजक भिम हमालले बताए ।
