कृषि
कृषि विश्वविद्यालयले परिकल्पना अनुसार काम गर्न सकेनः प्रचण्ड
![Banner](https://narayanionline.com/wp-content/uploads/2019/06/Prachanda-1.jpg)
चितवन, जेठ ३२–
नेपाल कम्युनिष्ट पार्टी (नेकपा)का अध्यक्ष एवंम पूर्व प्रधानमन्त्री पुष्पकमल दाहाल ‘प्रचण्ड’ले कृषि तथा वनविज्ञान विश्वविद्यालयले स्थापनाको औचित्य पुष्टि गर्न नसकेको भन्दै आलोचना गरेका छन् ।
कृषि तथा वनविज्ञान विश्वविद्यालयको आयोजनामा आजदेखि सुरु भएको कृषि प्रदर्शनी तथा कृषक मेला २०७६ को समुद्घाटन गर्दै अध्यक्ष प्रचण्डले विश्वविद्यालयको परिकल्पना अनुसार यस विश्वविद्यालयले काम गर्न नसकेको बताए । अध्यक्ष प्रचण्डले भने–‘राजनीतिक दल र सरकारमा गहन छलफलपछि कृषि विश्वविद्यालय स्थापना भएको, जसरी यसले गति लेला, अध्ययन र अनुसन्धान, प्रचारप्रसारको प्रक्रिया, उत्पादनसंग यसको सम्बन्ध, किसानहरुको जीवनसंग यसको प्रभावकारिता जे परिकल्पना गरिएको थियो त्यो परिकल्पना अनुसार काम भएको त्यति देखिएन, बरु अरु विश्वविद्यालय जस्तै अर्को विश्वविद्यालय थपिएको जस्तो मात्रै भएको छ ।’
अध्यक्ष प्रचण्डले यस विश्वविद्यालयलाई उत्पादन वृद्धि र रोजगारी सृष्टिको अध्ययन, अनुसन्धान, प्रचारप्रसार र वितरणको एउटा नयाँ अभियानको थालनी कर्ताको रुपमामा अगाडि लैजान जरुरी रहेको बताए । उनले विश्वविद्यालयको विकासमा र आत्मनिर्भरता तिर नयाँ मोडलको कृषि विकास तिर लैजान सबैको संकल्प चाहिने भन्दै सरकार त्यसतर्फ अघि बढेको बताए । उनले यसका लागि सबैले आफ्नो ठाउँबाट मेहनत गर्न संकल्प गर्न आवश्यक रहेको बताए ।
पूर्वप्रधानमन्त्री तथा यसै क्षेत्रका सांसद समेत रहेका प्रचण्डले सामुहिक खेती प्रणाली तिर मोडालिटिको विकास गर्नका लागि ध्यान दिन विश्वविद्यालयलाई सोच्न सरकारलाई सल्लाह आग्रह समेत गरे ।
उनले कृषिलाई आधुनिकिरण र व्यवसायिकरण, कृषिमा उतपादन वृद्धि, युवाहरुलाई परिचालन गर्ने नयाँ अभियान नचलाएसम्म नेपालको विकासको समस्या यथार्थमा समाधान हुन नसक्ने दावी गरे । उनले विकासलाई गति दिन नसक्दा नै नेपालमा खाद्यान्न आयात गर्नुपर्ने अवस्था सिर्जना भएको बताए । उनले कृषि क्षेत्रमा विज्ञान र प्रविधिको राम्रो प्रयोग र अध्ययन अनुसन्धानलाई किसानको उत्पादनको वृद्धिसंग जोड्न सकेको भए तीन करोडलाई मात्र नभइ १० करोडलाई पुग्ने उत्पादन नेपालमै हुने बताए । अध्यक्ष प्रचण्डले भने–‘हाम्रो मूख्य संभावना भनेकै कृषिमा आधारित अर्थतन्त्र र कृषिमा आधारित उद्योगद्धारा मात्रै हो, नेपालमा आर्थिक क्रान्ति र आर्थिक समृद्धिको नयाँ युगको सुत्रपात गर्न संभव छ ।’
कार्यक्रममा प्रतिनिधि सभा सदस्य कृष्णभक्त पोखरेल, कृषि मन्त्रालयका सचिव युवकध्वज जिशी, नेकपा चितवनका अध्यक्ष यमबहादुर परियार, नेपाली काँग्रेस चितवनका सभापति जितनारायण श्रेष्ठलगायतले मन्तव्य व्यक्त गरेका थिए । विश्वविद्यालयका रजिष्टार मनराज कोलाक्षपतिले स्वागत मन्तव्य व्यक्त गरेको कार्यक्रम विश्वविद्यालयका उपकुलपति प्रा.डा.इश्वरीप्रसाद ढकालको अध्यक्षतामा सम्पन्न भएको थियो ।
आजदेखि सुरु भएको मेला चारदिन सम्म चल्ने छ । मेलामा विभिन्न ५० वटा स्टलहरु रहेका छन् ।