भारतको जम्मू-कश्मीरस्थित कठुआमा केन्द्रीय औद्योगिक सुरक्षा बल (सीआईएसएफ) का एक जवानले सहकर्मीमाथि गोली चलाउँदा चार जनाको मृत्यु भएको छ ।
मंगलबार साँझ बसोहलीस्थित पावर प्रोजेक्टको सुरक्षामा खटिएका जवान अभिदेश कुमार सिंहले सरकारी एके–४७ राइफलबाट गोली चलाएको भारतीय सञ्चारमाध्यमले जनाएका छन् । घटनामा सहायक कमान्डेन्ट अंकित कुमार पाण्डे, सब–इन्स्पेक्टर लक्ष्मण सिंह तथा कन्स्टेबल रफिक अहमद र सन्दीप कुमारको मृत्यु भएको छ ।
प्रहरीले अभिदेशलाई नियन्त्रणमा लिएर पक्राउ गरेको छ । घटनापछि सीआईएसएफ मुख्यालयले छानबिनका लागि कोर्ट अफ इन्क्वायरी गठन गर्ने प्रक्रिया अघि बढाएको छ ।
भारतीय सञ्चारमाध्यमका अनुसार अभिदेश आफ्नी पत्नी पूजा र उनको बच्चालाई क्वार्टर गार्डमा प्रवेश गराउने विषयमा भएको विवादपछि मेस सेक्सनमा पुगेका थिए । त्यहाँ रहेका चार जवानमाथि उनले गोली चलाएको बताइएको छ ।
भारतको गृह मन्त्रालयका अनुसार केन्द्रीय सशस्त्र प्रहरी बलमा यस्ता घटनाका पछाडि व्यक्तिगत तथा पारिवारिक समस्या, कामको तनाव, पारिवारिक विवाद र सामान्य विवादपछि आक्रोशित हुनेलगायतका कारण देखिएका छन् । गृह मन्त्रालयले यस्ता घटनाको कारण अध्ययन गर्न सन् २०२१ मा कार्यदल गठन गरेको थियो । एजेन्सी
