चीनको तिब्बतबाट नेपाल छिर्ने त्रिशूली नदीमा आकस्मिक बाढी आई जलसतह उल्लेख्य रूपमा बढेकाले नदी तटीय क्षेत्रका बासिन्दालाई उच्च सतर्कता अपनाउन जिल्ला प्रशासन कार्यालय चितवनले अनुरोध गरेको छ। जिल्ला प्रशासन कार्यालय रसुवाको सूचनाका आधारमा चितवन प्रशासनले बुधबार अत्यन्त जरूरी सूचना जारी गर्दै सम्भावित विपद्बाट बच्न पूर्वतयारी र सावधानी अपनाउन आग्रह गरेको हो।
प्रशासनले त्रिशूली र नारायणी नदीमा माछा मार्ने, बालुवा-गिट्टी उत्खनन गर्ने वा अन्य काम गर्ने व्यक्ति तथा मजदुरहरूलाई तत्काल नदी क्षेत्रमा नगर्न र नदी किनारमा रहेका भए तुरुन्त सुरक्षित स्थानमा जान निर्देशन दिएको छ। साथै, नदी तटीय क्षेत्रमा बसोबास गर्ने आम जनसमुदाय, निर्माणाधीन तथा सञ्चालित आयोजनाहरू र नदी किनारका कार्यालयहरूलाई आवश्यक पूर्वतयारीमा जुट्न भनिएको छ।
स्थानीय तहहरूलाई नदी किनार तथा बाढी-पहिरोको दृष्टिकोणले जोखिमपूर्ण स्थानमा बसोबास गर्ने बासिन्दाहरूलाई तत्काल सुरक्षित स्थानमा सार्न आग्रह गरिएको छ।
विपद्को अवस्थामा थप सहयोग, समन्वय तथा सहजीकरणका लागि प्रशासनले देहायका नम्बरहरूमा सम्पर्क गर्न अनुरोध गरेको छ:
नेपाल प्रहरी: १००
सशस्त्र प्रहरी बल नेपाल: १११४
जिल्ला आपतकालीन केन्द्र (DEOC): १२३४
जिल्ला प्रहरी कार्यालय, चितवन (सूचना अधिकारी): ९८५५०१३९९९
जिल्ला प्रशासन कार्यालय, चितवन (सूचना अधिकारी): ९८५५०९२२००
