चितवनकी सांसद बिनु रायमाझी (पौडेल) बागमती प्रदेशको सहकारी तथा गरिबी निवारण मन्त्रीमा नियुक्त हुनुभएको छ । मुख्यमन्त्री इन्द्रबहादुर बानियाँले बागमतीको मन्त्रिपरिषद् विस्तारको क्रममा रायमाझीलाई मन्त्रीमा नियुक्त गर्नभएको हो । नेपाली कांग्रेसकी सांसद रायमाझी चितवनबाट समानुपातिक सांसदमा निर्वाचित हुनुभएको थियो । उहाँसँगै बानियाँले सामाजिक विकास मन्त्रीमा कञ्चनचन्द्र बादे, आर्थिक मामिला तथा योजना मन्त्रीमा प्रभा चामाङ, युवा तथा खेलकुद मन्त्रीमा उर्मिला केसी नेपाल र संस्कृति तथा पर्यटन मन्त्रीमा सुरेश श्रेष्ठलाई नियुक्त गर्नुभएको छ । बानियाँले आज नेपाली कांग्रेसबाट पाँच जनालाई मन्त्री नियुक्त गरी मन्त्रीपरिषद् विस्तार गर्नुभएको हो ।
नवनियुक्त मन्त्रीहरूलाई आज एक समारोहबीच प्रदेश प्रमुख दीपकप्रसाद देवकोटाले सपथग्रहण गराउनुभयो । यही साउन २० गते मुख्यमन्त्रीमा नियुक्त हुनुभएका बानियाँले सोही दिन नौ सदस्यीय मन्त्रीपरिषद् गठन गर्नुभएको थियो । यसअघि मुख्यमन्त्री बानियाँको सिफारिसमा कांग्रेसबाट शिवराज अधिकारीलाई बिना विभागीयमन्त्री र कृष्णा तामाङलाई खानेपानी, ऊर्जा तथा सिंचाइ मन्त्री बन्नुभएको थियो ।
मन्त्री अधिकारीलाई आन्तरिक मामिला तथा कानून मन्त्रालयको जिम्मेवार दिइएको छ । यस्तै मुख्यमन्त्री बानियाँले नेपाल कम्युनिस्ट पार्टी ९एमाले० का तर्फबाट मधुसूदन पौडेललाई कृषि तथा पशुपंक्षी विकास मन्त्री, डा. दिनेशचन्द्र देवकोटालाई भौतिक पूर्वाधार विकासमन्त्री, भरत केसीलाई वन तथा वातावरण मन्त्री, जयराथ थापालाई श्रम तथा यातायात मन्त्री, बिन्दु श्रेष्ठलाई उद्योग, वाणिज्य, भूमि तथा प्रशासनमन्त्रीमा नियुक्त गर्नुभएको थियो ।
