ग्रासरुट क्रिकेटको विकास गर्न भरतपुर महानगरपालिकाले आयोजना गरेको दोस्रो संस्करणको भरतपुर मेयर्स कप अन्तरविद्यालय क्रिकेट प्रतियोगिता अन्तरगत आज (आइतबार) भएका खेलहरुमा लक्ष्मी मावि जगतपुर र मावि गंगानगर विजयी भएका भएका छन् ।
आजको दोस्रो खेलमा लक्ष्मी माविले नयाँ किरण माविलाई ८२ रनको फराकिलो अन्तरले पराजित गर्यो । १५७ रनको विशाल लक्ष्य पछ्याएको नयाँ किरण मावि १०.३ ओभरमा ७४ रनमै अलआउट भयो । उसका लागि विकास मण्डलले सर्वाधिक २२ रन बनाए भने सजिद अन्सारीले १४ रन बनाए । नयाँकिरणलाई सस्तैमा समेट्न लक्ष्मी माविका गुलशन शर्माले २ ओभरमा मात्र ७ रन खर्चिदै ५ विकेट लिए । समिर गैरेले २ ओभरमा १० रन खर्चिदै एक विकेट लिए ।
यसअघि पहिले ब्याटिङ गरेको लक्ष्मी माविले निर्धारित २० ओभरमा ४ विकेट गुमाउँदै १५६ रन बनाएको थियो । उसका लागि कुन्दन यादवले २८, जलन्धर यादवले २७ रन बनाए ।
नयाँ किरणका एकरमुल अन्सारीले ४ ओभरमा १२ रन खर्चिदै २ विकेट लिए भने रुपेश ठाकुरले ४ ओभरमा ३५ रन खर्चिदै एक विकेट लिए । खेलमा ५ विकेट लिएका लक्ष्मी माविका गुलशन शर्मा प्लेयर अफ दि म्याच घोषित भए ।
यसअघि आजै भएको पहिलो खेलमा मावि गंगानगर १९ रनले विजयी भयो । गंगानगरले दिएको ७३ रनको झिनो लक्ष्य पछ्याएको जानकी मावि १७.२ ओभरमा ५४ रनमै अलआउट भयो । जानकीका सुमित चौधरीले सर्वाधिक १० रन बनाए भने राहुल पौडेलले ७ रन जोडे । गंगानगरका जय प्रकाश यादवले ४ ओभरमा ९ रन खर्चिदै ३ विकेट लिए भने अंकित बोटेले २.२ ओभरमा ९ रन खर्चिदै २ विकेट लिए ।
यसअघि टस हारेर पहिले ब्याटिङ गरेको गंगानगर ११.५ ओभरमा ७२ रनमा अलआउट भयो । उसका लागि राज विकेले ९ र अंकित बोटेले ७ रन बनाए । गंगानगरलाई अलआउट गर्न जानकीका राहुल पौडेलले ४ ओभरमा १६ रन खर्चिदै ४ विकेट लिए भने सुमित चौधरीले ४ ओभरमा २० रन खर्चिदै २ विकेट लिए । खेलमा गंगानगरका जयप्रकाश यादव प्लेयर अफ दि म्याच घोषित भए ।
प्रतियोगिता अन्तरगत भोलि (सोमबार) पनि दुई खेल हुँदैछन् । पहिलो खेलमा प्रेमबस्ती मावि र शहिद स्मृति माविबीच प्रतिस्पर्धा हुनेछ भने दोस्रो खेलमा दिउँसो राष्ट्रिय मावि तोरीखेत र सिद्धार्थ मावि केरुङबीच प्रतिस्पर्धा हुनेछ ।
तीन महिनासम्म चल्ने प्रतियोगितामा ४७ विद्यालयको सहभागिता रहेको छ । प्रतियोगितामा कुल ६१ खेल हुनेछन् । पहिलो चरणमा संस्थागत र सामुदायिक विद्यालयको छुट्टाछुट्टै नकआउट चरणमा छनोट खेल हुनेछ । विजेता टिमहरु दोस्रो चरणमा प्रवेश गर्नेछन् ।
छनोट पार गरेका टिम, पहिलो संस्करणका सेमीफाइनल पुगेर सिधै दोस्रो चरणमा प्रवेश गरेका ४ र बाई परेर सिधै दोस्रो चरणमा पुगेका एक टिमबीच लिग चरणमा खेल हुनेछन् । लिगका उत्कृष्ट चार टिमबीच सेमीफाइनल हुँदै फाइनल प्रतिस्पर्धा हुनेछ ।
