चितवनमा पछिल्लो समय पटक पटक खाद्य वस्तुमा मूल्य वृद्धि हुँदा सर्वसाधारण मारमा परेका छन् ।
दैनिक प्रयोग हुने खाद्य वस्तु चिनी, चामल, आटा, मैदालगायतका उपभोग्य वस्तुमा चर्को मूल्यवृद्धि हुँदा सर्वसाधारण मारमा परेका हुन् ।
भरतपुर माहानगरपालिका–४ एसएस स्टोरका सञ्चालक साबित्री थापाले पछिल्लो समय खाद्य वस्तुको मूल्य वृद्धि भएको जानकारी दिइन् । उनको अनुसार पहिले चामलको मूल्य प्रति बोरा एक हजार ६५० थियो भने अहिले बढेर दुई हजार देखि २५ सय पुगेको छ । उनी भन्छिन्, ‘पछिल्लो समय चामलसँगै आटा र मैदाका मूल्य धेरै बढेको छ । पहिले ५ किलोको आटालाई २८० पर्ने गथ्र्यो तर अहिले बढेर ३०० हुँदै ३४० बाट पुनः बढेर ४२० पुगेको छ । त्यस्तै मैदा पहिले ६० रुपैयाँ किलो थियो भने अहिले प्रति केजी ४० रुपैयाँले बढेर १०० रुपैयाँ केजी पुगेको छ । ’
उनको अनुसार यो आर्थिक वर्षमा चिनीको मूल्य पनि बोरामा २५० ले बढेको छ । जसको कारण पहिले प्रतिकेजी ८५ मा बेच्दै आएको चिनी अहिले ९५ पुग्न गएको छ । उनले नारायणी अनलाइनलाई दिएको जानकारी अनुसार अहिले ग्यास पनि एक हजार ७५० बाट एक हजार ८०० रुपैयाँ पुगेको छ । साबुन ६५० कार्टुनबाट ७५० पुगेको छ । त्यस्तै पछिल्लो समय मैदा महंगो भएको कारण १० रुपयाँको बिस्कुट पनि आएको छैन र पहिले ५० प्रिन्टेड भएको बिस्कुट पनि बढेर ८० पुगेको छ । उनी भन्छिन्, ‘तेल र दालको मूल्य केही घटे पनि अरु सबै खाद्य वस्तुको मूल्य बढेको छ । जसको कारण व्यापार गर्न कठिन भएको छ । पछिल्लो समय सबै खाद्य वस्तुको मूल्य बढ्दा पसलमा सामान थप्न पनि कठिन भएको छ ।
किराना व्यवसायी संघ चितवनका निवर्तमान अध्यक्ष रविन्द्रकुमार श्रेष्ठका अनुसार जिल्लामा मात्रै नभएर पूरै नेपालमा महंगी बढेको छ । उनका अनुसार नेपाली सामानको बजार उत्पादन कम हुँदा तथा सामानमा नेपाल भारत प्रति आत्मनिर्भर बन्दा देशमा पटक पटक महंगी बढेको हो । उनी भन्छन्, ‘पछिल्लो समय बैंकले ८ रुपयाँबाट ब्याज बढाएर १६ रुपयाँ पु¥याउँदा व्यवसायी घाटामा छन् र देशमा आर्थिक मन्दी लागेको छ ।’ उनले साबुन र सरफ बनाउन चाहिने कच्चा पदार्थ नेपालमा नपाइने र विदेशबाट ल्याउनुपर्ने भएकोले यसमा पनि मूल्य वृद्धि भएको जानकारी दिए ।
उद्योग वाणिज्य संघ चितवनका अध्यक्ष चुननारायण श्रेष्ठले भारतले पछिल्लो समय धान, गहँु नेपाल पठाउन कडाइ गरेको तथा भन्सार कर बढाउँदा खाद्यान्नको मूल्य वृद्धि भएको जानकारी दिए । उनका अनुसार विश्वमा आर्थिक मन्दी लागेको कारण यसको प्रभाव नेपालमा पनि परेको छ । तर, बजार अनुगमन भने दैनिक भइरहेको छ ।
पछिल्लो समय पटक–पटक खाद्यान्नको मूल्य अत्यधिक बढेकोले दैनिक घर खर्च चलाउन कठिन भएको भरतपुर माहानगरपालिका–११ मुक्तिनगर बस्ने अनुस्का पौडेल बताउँछिन् । उनी भन्छिन्, ‘हामीलाई त दैनिक गुजारा गर्न कठिन भएको छ भने दैनिक मजदुर गरेर घर खर्च टार्नेले के गर्ने ? नखाइ बस्न पनि सकिन्न, सामान लिन पसल जाम त महंगीले आकाश छोएको छ ।’ एउटै सामान पनि कुनै पसलमा पाँच रुपयाँ कम र कुनैमा पाँच रुपयाँ बढी पर्न गरेको उनको भनाइ छ । उनले पछिल्लो समय क्रमिक रुपमा बढ्दै गएको महंगी तथा कालो बजारी नियन्त्रण गर्न अनुगमनलाई तीव्र दिँदै आफ्नै देशमा उत्पादन भएका सामानलाई बढी प्रथमिकता दिनुपर्ने विचार राखिन् ।
महंगी र कालोबजारीको चपेटामा सोझासाझा जनता फसेको माहानगरपालिका–१६ की संजिता क्षेत्री बताउँछिन् । उनी भन्छिन्, ‘कही वर्ष अगाडि मात्रै पनि हजार रुपैयाँले घसायसी सबै किराना सामान आउथ्यो भने अहिले पाँच हजारले पनि सामान पूरा आउँदैन । ’ यसरी पटकपटक सामानको मूल्य बढ्दा समस्या भएको बताउँदै उनले कृषि गरेर परिवार पाल्ने किसानले तरकारी, फलफूलको उचित मूल्य नपाउँदा धेरै युवा विदेश गएको बताइन् । उनी भन्छिन्, ‘ दैनिक उपभोग गर्ने किराना सामानको मूल्य बढे पनि हामीले लाखौं खर्च गरेर उब्जाएको तरकारी, धानले मूल्य पाउन सकेको छैन । तर, अब सरकारले खाद्यान्नमा पटक पटक भएको मूल्य वृद्धि नियन्त्रण गर्न आफ्नै देशमा उत्पादन भएका खाद्य वस्तुलाई प्रथमिकता दिनुपर्छ । ’
