कालिका
चितवनको कालिकामा बन्यो उदयपुर पार्क
चितवन, फागुन १२–
पूर्वी चितवनको कालिका नगरपालिका वडा नं. ७ सगुनटोलमा रहेको उदयपुर सामुदायिक वन उपभोक्ता समूहले उदयपुर पार्क तथा बाल उद्यान निर्माण गरेको छ ।
सो उदयपुर पार्क तथा बाल उद्यानको एक कार्यक्रमका बीच गृहमन्त्री रामबहादुर थापा ‘बादल’ ले सोमबार उद्घाटन गरेका छन् । प्रदेश सरकारको आर्थिक सहयोगमा सामुदायिक वनले निर्माण गरेको सो पार्कको उद्घाटन गर्दै गृहमन्त्री थापाले पर्यटनको माध्यमबाट देशलाई आर्थिक समृद्धि तर्फ लानुपर्ने बताए । विभिन्न पार्क तथा उद्यानहरुले आन्तरिक तथा बाह्य पर्यटकहरुलाई आकर्षित गर्दै आर्थिक उपार्जन गर्नुपर्ने भन्दै मन्त्री थापाले पर्यापर्यटनको क्षेत्रमा सामुदायिक वनहरुको महत्वपूर्ण भूमिका रहेको समेत बताए ।
कार्यक्रममा वागमती प्रदेशका सांसद घनश्याम दाहाल लगायतले मन्तव्य व्यक्त गरेका थिए भने सामुदायिक वनका उपाध्यक्ष सुदर्शन अधिकारीले स्वागत मन्तव्य व्यक्त गरेका थिए । सो कार्यक्रम सामुदायिक वनका अध्यक्ष केशव लामाको अध्यक्षतामा सम्पन्न भएको थियो ।