नेकपाका उम्मेद्वारलाई पराजित गर्दै पूर्वीचितवनको कंकाली सामुदायिक वनको अध्यक्षमा नेपाली काँग्रेसका उम्मेद्वार राममणि न्यौपाने विजयी भएका छन् ।
शनिबार राती अबेर सकिएको मतगणनामा नेकपाका उम्मेद्वार रामेश्वर पोखरेललाई २६ मतान्तरले पराजित गर्दै काँग्रेसका न्यौपाने विजयी भएका हुन् । नेकपाबाट उम्मेद्वार बनेका पोखरेल साविक माओवादी केन्द्रका हुन् । अध्यक्षमा निर्वाचित न्यौपानेले ८५३ मत प्राप्त गरे भने पोखरेलले ८२७ मत प्राप्त गरे । यस्तै वनको अन्य पदमा भने नेकपाका उम्मेद्वारहरु विजयी भएका छन् ।
पछिल्लो समय चितवनमा हुने निर्वाचनहरुमा नेकपाबाट उम्मेद्वार बन्ने साविक माओवादीका उम्मेद्वारहरु बलियो अवस्थामा पनि पराजित हुँदै आइरहेका छन् । यसअघि निर्माण व्यवसायी संघ चितवनको निर्वाचनमा नेकपाबाट अध्यक्षमा उम्मेद्वार बनेका साविक माओवादी केन्द्रका उम्मेद्वार पराजित भएका थिए । निर्माण व्यवसायी संघमा काँग्रेस भन्दा नेकपा निकै बलियो थियो ।
पछिल्लो समय चितवनका विभिन्न संघसंस्थाहरुमा हुने निर्वाचनले राजनीतिक रंग लिने गरेको छ । जसका कारण निर्वाचनका नतिजालाई लिएर धेरैलाई चासोको विषय बनेको छ । यस्तैमा शनिबार पूर्वीचितवनको खैरहनीस्थित कंकाली सामुदायिक वनको निर्वाचनले पनि त्यस्तै माहोल ल्याएको थियो । जहाँ सत्तारुढ दल नेकपा र प्रमुख प्रतिपक्षी दल नेपाली काँग्रेसका उम्मेद्वारी चुनावी मैदानमा होमिएका थिए ।
