काठमाडौंमा आजदेखि सुरु भएको दक्षिण एसियाली खेलकुद (साग) को १३ औं संस्करण अन्तर्गतको पुरुष भलिबलमा बंगलादेशसँग घरेलु टोली नेपाल पराजित भएको छ ।
रोमाञ्चक खेलमा दुई पटक सेटमा अग्रता लिएपनि नेपाल बंगलादेशसँग ३–२ को सेटमा नेपाल पराजित हुन पुगेको हो । राष्ट्रिय खेलकुद परिषद् (राखेप) को कभर्ड हलमा भएको खेलको पहिलो सेटमा नेपालले २५–२१ ले सहजै जितेको थियो ।
दोस्रो सेटमा नेपालले ५ वटा सर्भिस बिगारेपछि २५–२३ ले गुमाएको थियो । तेस्रो सेटमा नेपालले उत्कृष्ट पुनरागमन गर्दै २५–१९ ले आफ्नो पक्षमा पारेको थियो । चौथो सेट निकै प्रतिस्पर्धात्मक रह्यो । तर, अन्त्यमा नेपालले २६–२४ ले त्यो सेट गुमाएको थियो ।
पाँचौ सेटमा बंगलादेशले लगातार दवाव कायम राख्दै १५–१२ को जित दर्ता गर्न सफल रहयो ।
त्यसअघि महिलातर्फको खेलमा नेपालले बंगलादेशलाई ३–० को सोझो सेटमा हराएको थियो । नेपालले २९–९,२५–९ र २५–११ ले विजयी भएको थियो ।
