राष्ट्रिय लोक तथा दोहोरी गीत प्रतिष्ठान–नेपाल चितवन शाखाले आज (शुक्रबार) श्री राष्ट्रिय मावि इच्छाकामना–७, गर्दासमा निःशुल्क आँखा तथा स्वास्थ्य शिविर गरेको छ ।
नेपाल नेत्रज्योति संघ चितवन, भरतपुर आँखा अस्पताल, तीनकन्या सामुदायिक वन उपभोक्ता समूह, नेपाल औषधि व्यवसायी संघ, लायन्स क्लव अफ नारायणढ र लायन्स क्लव अफ नारायणगढ मिड टाउनको संयुक्त आयोजनामा विहान ८ बजेदेखि दिउँसो ३ बजेसम्म भएको शिविरमा २१६ जनाको आँखा र स्वास्थ्य परीक्षण गराएको संस्थाका सचिव जिवि सुनारले जानकारी दिए । यस्तै सो क्रममा चार सय जना विद्यार्थीको दृष्टि परीक्षण गरिएको थियो । उनीहरुलाई चश्मा समेत वितरण गरिएको थियो ।
परीक्षणको क्रममा मोतियाबिन्दु देखिएका २६ जना बिरामीलाई नेपाल नेत्रज्योति संघले निःशुल्क शल्यक्रियाको व्यवस्था गरिएको कार्यक्रम संयोजक प्रतिष्ठानका संस्थापक अध्यक्ष एवंम् सल्लाहकार शान्त कुमार पियाले जानकारी दिए । संयोजक पियाले बिरामीहरुलाई निःशुल्क औषधि समेत वितरण गरिएको जानकारी दिए ।
प्रतिष्ठानका अध्यक्ष लोकबहादुर रानाभाटको अध्यक्षतामा भएको कार्यक्रममा आनन्द रञ्जित, कृष्ण भट्टराई, वसन्त लामा, रोशन खड्का, उपेन्द्र देवकोटा, मानबहादुर मगर, जुना डिसी, आयुष्मा केसीलगायत कार्यसमितिको सहभागिता रहेको थियो ।
