चितवनको भरतपुर महानगरपालिका–१० स्थित नारायणी नमुना माध्यमिक विद्यालयको आयोजनामा सञ्चालित जिल्लास्तरीय गणितीय प्रतिभा खोज प्रतियोगिता ‘NMSS Maths Talent Hunt – 2083 (Season 1)’ बुधबार सम्पन्न भएको छ।
विद्यार्थीहरूमा गणित विषयप्रतिको रुचि अभिवृद्धि गर्ने, तार्किक चिन्तन, विश्लेषणात्मक क्षमता तथा समस्या समाधान गर्ने सीपको विकास गर्ने र जिल्लाभरका गणितीय प्रतिभाहरूको पहिचान एवं प्रोत्साहन गर्ने उद्देश्यले प्रतियोगिता आयोजना गरिएको हो।
प्रतियोगितामा उत्कृष्ट प्रदर्शन गर्दै अरोमा इङ्लिस हायर सेकेन्डरी स्कुल (Aroma English Higher Secondary School) प्रथम भएको छ। त्यस्तै, युनिक एकेडेमी (Unique Academy) द्वितीय र अर्बिट युनिक इङ्लिस सेकेन्डरी स्कुल (Orbit Unique English Secondary School) तृतीय स्थान हासिल गर्न सफल भएका छन्।
प्रतियोगितामा प्रथम स्थान हासिल गर्ने विद्यालयले नगद १० हजार रुपैयाँसहित ट्रफी र प्रमाणपत्र, द्वितीय हुने विद्यालयले नगद ७ हजार ५ सय रुपैयाँसहित ट्रफी र प्रमाणपत्र तथा तृतीय हुने विद्यालयले नगद ५ हजार रुपैयाँसहित ट्रफी र प्रमाणपत्र प्राप्त गरेका छन्।विद्यालयका प्रधानाध्यापक रामशरण दुवाडीको अध्यक्षतामा सम्पन्न प्रतियोगितामा विद्यार्थीहरूले आफ्नो गणितीय ज्ञान, तार्किक क्षमता, सिर्जनशीलता तथा समस्या समाधान गर्ने दक्षता प्रदर्शन गरेका थिए।
प्रतियोगिताको मूल्याङ्कन समितिमा गणित विषयका विज्ञहरू रमाकान्त सापकोटा, गुरुप्रसाद पौडेल र टेकनाथ पौडेल रहनुभएको थियो। मूल्याङ्कन समितिले प्रतियोगितामा सहभागी विद्यार्थीहरूको प्रस्तुतिको मूल्याङ्कन गरी उत्कृष्ट विद्यालयहरूको छनोट गरेको थियो।कार्यक्रमको सञ्चालन राजकुमार कँडेलले गर्नुभएको थियो।कार्यक्रमका सम्बन्धमा जानकारी दिँदै नारायणी नमुना माध्यमिक विद्यालयका गणित विभाग प्रमुख (HOD, Mathematics Department) तथा NMSS Maths Talent Hunt का कार्यक्रम संयोजक भेगलाल बरालले विद्यार्थीहरूमा अन्तर्निहित गणितीय प्रतिभाको पहिचान, विकास तथा प्रोत्साहन गर्नु प्रतियोगिताको प्रमुख उद्देश्य रहेको जानकारी दिनुभयो।
यस्ता शैक्षिक प्रतियोगिताले विद्यार्थीहरूमा गणित विषयप्रतिको आत्मविश्वास अभिवृद्धि गर्नुका साथै तार्किक चिन्तन, विश्लेषणात्मक क्षमता, सिर्जनशीलता तथा स्वस्थ प्रतिस्पर्धाको भावना विकास गर्न महत्त्वपूर्ण योगदान पुर्याउने अपेक्षा गरिएको छ।प्रतियोगिताले जिल्लाका विभिन्न विद्यालयका विद्यार्थीहरूलाई एउटै शैक्षिक मञ्चमा सहभागी भई आफ्नो गणितीय दक्षता प्रदर्शन गर्ने अवसर प्रदान गरेको छ। साथै, विद्यालयहरूबीच शैक्षिक सहकार्य, ज्ञान आदानप्रदान तथा सकारात्मक प्रतिस्पर्धाको वातावरण निर्माण गर्नसमेत कार्यक्रम महत्त्वपूर्ण बनेको छ।
कार्यक्रमको सफल समापनसँगै आयोजक नारायणी नमुना माध्यमिक विद्यालयले विजेता तथा सहभागी सम्पूर्ण विद्यालय, विद्यार्थी, शिक्षक, विषयविज्ञ, मूल्याङ्कन समिति, आयोजक टोली तथा कार्यक्रम सफल बनाउन प्रत्यक्ष एवं अप्रत्यक्ष रूपमा सहयोग पुर्याउने सम्पूर्ण महानुभावहरूप्रति हार्दिक आभार व्यक्त गरेको छ।
गणितीय प्रतिभाको पहिचान, विकास र प्रोत्साहनलाई केन्द्रमा राखेर आयोजना गरिएको ‘NMSS Maths Talent Hunt’ को पहिलो संस्करणको सफलताले आगामी दिनमा समेत यस्ता शैक्षिक, सिर्जनात्मक तथा प्रतिस्पर्धात्मक कार्यक्रमहरूलाई निरन्तरता दिन सकारात्मक आधार तयार गरेको छ।
