काठमाडौं– नेपाली सेनाले विभिन्न प्रयोजनका लागि आफ्ना विमान भाडामा उपलब्ध गराए वापत ४ करोड ३४ लाख बढी उठाउन बाँकी रहेको छ ।
नेपाली सेनाले आर्थिक वर्ष २०३४/०३५ देखि नै बाँकी रहेको वक्यौता उठाउन नसकेको महालेखा परीक्षकको कार्यालयले जनाएको छ ।
महालेखा परीक्षकको ५६ औं प्रतिवेदनमा सेनाले आफ्ना जहाज तथा हेलिकप्टरहरु भाडामा लगाएर बापत ४ करोड ३४ लाख ६० हजार रुपैयाँ असुल गर्न बाँकी रहेको उल्लेख छ ।
सेनाले विशिष्ट व्यक्तिका लागि गरेको भीभीआईपी उडानवापत मात्रै ५१ लाख ८३ हजार रुपैयाँ असुल गर्न बाँकी रहेको महालेखा परीक्षकको ५६ औं प्रतिवेदनमा उल्लेख छ ।
सेनाले आर्थिक वर्ष २०३४/०३५ देखि हालसम्म गरी ४१ वर्षसम्मको विमान चार्टर उडानको वक्यौता असुल गर्न सकेको छैन ।
जसमध्ये आर्थिक वर्ष २०३४/०३५ देखि २०७३/७४ सम्म विभिन्न निकायले सेनाका हेलिकप्टर तथा जहाज भाडामा प्रयोग गरेवापत मात्रै ३ करोड ७ लाख ५९ हजार बुझाएका छैनन् । यस्तै आर्थिक वर्ष २०४२/०४३ देखि २०७३/०७३ सम्म भीभीआईपी उडान वापतको ५१ लाख ८३ हजार रुपैयाँ सेनाले असुल गर्न सकेको छैन ।
