दाउन्ने एग्रो फार्म लिमिटेड समूहले गत आर्थिक वर्षमा रु. १२ करोड ८९ लाख करपूर्वको मुनाफा आर्जन गरेको छ । कम्पनीले अघिल्लो आर्थिक वर्षमा रु. ११ करोड ८५ लाख मुनाफा गरेको थियो । यो ८.७७ प्रतिशतले बृद्धि हो । कम्पनीको आज यहाँ सम्पन्न नवौं वार्षिक साधारण सभाले वित्तिय प्रतिवेदन पारित गरेको छ ।
दाउन्ने समूहको करपछिको खुद मुनाफा रु। १० करोड २१ लाख पुगेको छ । जुन अघिल्लो वर्षको रु। नौ करोड आठ लाखको तुलनामा करिब १२.४२ प्रतिशतले बृद्धि हो । कम्पनीको मात्रै खुद मुनाफा रु. नौ करोड २९ लाख रहेको छ, जुन अघिल्लो वर्षको रु. आठ करोड १५ लाखको तुलनामा उल्लेखनीय बृद्धि हो ।
यस वर्ष समूहको प्रति शेयर आम्दानी रु. २०.१४ कायम भएको छ भने दाउन्ने एग्रोको मात्रै १८.३७ पुगेको छ । दाउन्ने समूहमा दाउन्ने एग्रो फार्म लिमिटेड, दाउन्ने ट्रे एण्ड प्याकेजिङ इन्डस्ट्रिज प्रा.लि., किसान एग्रो इन्डस्ट्रिज प्रा.लि., दाउन्ने मल्ट्री एग्रो एण्ड रिसर्च प्रा.लि. रहेका छन् ।
विनयी त्रिवेणी–३ नवलपरासीमा ११ बिघा जमिनमा उद्योग फैलिएको दाउन्ने एग्रो फार्म लिमिटेडमा गत आर्थिक वर्षको अन्त्यसम्ममा समूह अन्तर्गत ३ लाख ९३ हजार १४१ वटा लेयर्स कुखुरा तथा एक लाख एक हजार ३१८ चल्ला गरी चार लाख ९४ हजार ४५९ वटा कुखुरा रहेका छन् । गत आर्थिक वर्षमा नौ करोड २४ लाख ४९ हजार १४० अण्डा बिक्री कम्पनीले गरेको छ ।
दाउन्ने एग्रो फार्म लिमिटेडको चुक्ता पूँजी २०८२÷०८३ को अन्त्यमा रु। ५२ करोड पुगेको छ । समूहको सञ्चालन आम्दानी रु. एक अर्ब ४० करोड १२ लाख रहेको छ भने कम्पनीको मात्रै रु. एक अर्ब ३६ करोड ७९ लाख रहेको छ ।
साधारण सभाले सञ्चालक समितिको तर्फबाट अध्यक्ष विनोद पोखरेलले प्रस्तुत गर्नुभएको आर्थिक वर्ष २०८२/०८३ को वार्षिक प्रतिवेदन पारित गरेको छ । यस्तै आर्थिक वर्ष २०८२/०८३ को लेखापरीक्षणको प्रतिवेदन सहितको वासलात, नाफा नोक्सान हिसाब, नगद प्रवाह विवरण लगायतका वित्तीय विवरणहरु छलफल गरी स्वीकृत गरेको छ । सभाले आगामी आर्थिक वर्षका लागि एस डी बि सी एसोसिएट्सलाई लेखापरीक्षक नियुक्त गर्ने निर्णय गरेको छ । कम्पनीको साधारण सभा हरेक आर्थिक वर्षको भदौ १३ गते गर्ने निर्णय समेत गरेको छ ।
दुग्ध विकास संस्थानका महाप्रबन्धक डा. शरणकुमार पाण्डेको प्रमुख आतिथ्यमा भएको सभामा कम्पनीका अध्यक्ष विनोद पोखरेल, सञ्चालकहरु रघुनाथ भट्ट, विन्दु पोखरेल लगायतले बोल्नु भएको थियो । सो अवसरमा सिटिजन बैंकका चिफ इन्फास्ट्रक्चर÷ कन्सोटियम तथा कर्पोरेट बैंकिङ अफिसर रोशन मल्ल, आध्यान्त फण्ड म्यानेजमेन्टका प्रमुख कार्यकारी अधिकृत सन्तोष थापा, कम्पनीका वित्तिय सल्लाहकार ऋषिराम चालिसे, शेयरधनीका तर्फबाट माधवप्रसाद अर्याल लगायतले शुभकामना दिनु भएको थियो ।
सभामा वित्तिीय प्रतिवेदन प्रमुख कार्यकारी अधिकृत विजयप्रसाद पौडेलले प्रस्तुत गर्नुभएको थियो भने फार्म प्रबन्धक भुवन लामिछानेलाई उत्कृष्ट कार्य गरे वापत प्रशंसापत्र प्रदान गरिएको थियो ।
