काठमाडौँ महानगरपालिकाले १२ वटा सामुदायिक विद्यालयको पूर्वाधार विकास तथा सुधारका लागि आवश्यक प्रक्रिया अघि बढाएको छ । त्यसका लागि रु ६२ करोड २८ लाख बराबर खर्च गरिने छ ।
विद्यालयको भौतिक अवस्थालाई प्रचलित मापदण्डअनुसार सुधार गर्न विद्यार्थी सङ्ख्या, जग्गाको स्वामित्व, भौगोलिक जोखिम तथा पूर्वाधारको आवश्यकताका आधारमा बजेट उपलब्ध गराइने कामपा शिक्षा विभागले जनाएको छ ।
सहरी योजना आयोगले गरेको अध्ययनका आधारमा विद्यालयको पूर्वाधार निर्माणका लागि आवश्यक खरिद प्रक्रिया अघि बढाइएको कामपा शिक्षा विभाग प्रमुख नवराज ढकालले जानकारी दिनुभयो ।
ढकालका अनुसार प्रत्येक विद्यालयको जिपिएस लोकेसन, विद्यार्थी र जग्गाको अनुपात तथा बाढीजस्ता प्राकृतिक जोखिमको अवस्था पनि अध्ययन गरेपछि मात्र लगानीको प्रस्ताव अघि सारिएको हो ।
“सामुदायिक विद्यालयको शैक्षिक गुणस्तरलाई प्रतिस्पर्धी र समयको मागअनुसार बनाउन हामीले लगानी बढाएका छौँ,” कार्यवाहक प्रमुख सुनिता डङ्गोलले भन्नुभयो, “बालमैत्री सिकाइ, प्रविधिमा आधारित कक्षाकोठा, वातावरणीय सुधार र सजावट तथा प्रयोगात्मक अभ्यासका अवसरजस्ता सुविधा समान रूपमा उपलब्ध गराउने हाम्रो योजना छ ।”
शिक्षा विभागका महाशाखा प्रमुख सुशील सुवेदीले विद्यालयको खरिद प्रक्रिया अघि बढाइएको जानकारी दिनुभयो ।
शिक्षा विभागले वडा नं १४ मा रहेको जनविकास माध्यमिक विद्यालय र वडा नं २८ मा रहेको पद्मोदय माध्यमिक विद्यालयको भवन निर्माणको प्रक्रिया अघि बढाएको छ ।
त्यसका लागि क्रमशः रु पाँच करोड ६७ लाख ६८ हजार ८६२ र रु १५ करोड ३५ लाख ७४ हजार बजेट विनियोजन गरिएको छ ।
सार्वजनिक निर्माण विभागमार्फत छवटा विद्यालयको पूर्वाधार निर्माणका लागि खरिद प्रक्रिया अघि बढाइएको छ ।
त्यसअन्तर्गत वडा नं २४ मा रहेको श्री कान्ति ईश्वरी राज्यलक्ष्मी आधारभूत विद्यालयका लागि रु पाँच करोड ५७ लाख ४९ हजार बराबरको बजेट उपलब्ध गराइनेछ ।
त्यस्तै, वडा नं २६ मा रहेको शान्ति विद्यागृह माध्यमिक विद्यालयको भवन निर्माणका लागि रु आठ करोड ५७ लाख ४२ हजार बजेट उपलब्ध हुने छ । वडा नं २९ को अटिजम स्कुलका लागि रु १० करोड ९१ लाख ७९ हजार विनियोजन गरिएको छ ।
रु एक करोड ८३ लाख २९ हजार बराबरको लागतमा दरबार हाई स्कुलको बहुउद्देश्यीय सभा कक्ष निर्माण गरिने छ । रु ८४ लाख १२ हजारको लागतमा महेन्द्र मावि बौद्धको मर्मतसम्भार गरिनेछ ।
रु नौ करोड ६२ लाख ५४ हजारको लागतमा कन्या माध्यमिक विद्यालयको छात्रावास तथा कक्षाकोठा निर्माणका लागि खरिद प्रक्रिया सुरु भइसकेको विभागले जनाएको छ । रासस
