म्याग्दीको बेनीमा रहेको प्रदेश अस्पतालमा डायलाइसिस सेवा विस्तार भएको छ ।
गण्डकी प्रदेश सरकारको सहयोगमा अस्पतालले डायलाइसिस सेवा विस्तार गरेपछि म्याग्दीका मृगौलाका बिरामीहरूलाई सहज भएको छ । डायलाइसिसका लागि पोखरा, पर्वत, बागलुङ र काठमाडौँका अस्पताल जादाँ हुने झन्झट, समय र खर्चको बचत भएको धवलागिरी गाउँपालिका–४ बाँसबोटका सन्तोषकुमार पुर्जाले बताउनुभयो ।
“डायलाइसिस गराउन कुश्मा अस्पताल जान आउन भनेको समयमा गाडी नपाउने, समय र पैसाको खर्च हुने समस्या थियो”, उहाँले भन्नुभयो, “गत हप्तादेखि बेनीमा डायलाइसिस गराउन थालेपछि कुश्मा जाँदा हुने समय र खर्चको बचत भएको तथा झन्झट हटेको छ ।”
विसं २०७७ साउन २५ गते पाँच वटा उपकरणबाट सुरु भएको बेनी अस्पताललाई प्रदेश सरकारले हालै थप तीन वटा डायलाइसिस उपकरण उपलब्ध गराएको थियो । चालु रहेका नौ वटा मेसिनको सहायताले दैनिक ४५ जनालाई डायलाइसिस सेवा उपलब्ध गराउन सकिने अस्पतालका प्रमुख डा हेमन्त बाँस्तोलाले बताउनुभयो ।
“यसअघि ३७ जनाले डायलाइसिस सेवा लिइरहेको बेनी अस्पतालमा हाल ४० जना पुगेका छन्”, उहाँले भन्नुभयो, “प्रतीक्षा सूचीमा रहेका १० जना मृगौलाका बिरामीलाई बेनीमै डायलाइसिस सेवा उपलब्ध गराउन सम्पर्क गरेका छौँ ।”
एक जना अमेरिकामा रहेका म्याग्दीका मृगौला रोगीले बेनीमै डायलाइसिस गराउन सम्पर्कमा आएको अस्पताल व्यवस्थापन समितिका अध्यक्ष डेकबहादुर बानियाँले बताउनुभयो । संघीय सरकारले उपलब्ध गराएको दुई वटा मध्ये एक वटा डायलाइसिस मेसिन बिग्रिएको छ ।
दुई वटा मेसिनलाई जगेडामा राखिएको छ । यसअघि प्रादेशिक जनस्वास्थ्य कार्यालयको भवनको भुइतलाको साँघुरो कोठामा डायलाइसिस सेवा सञ्चालन भएको थियो । अस्पतालको यसअघि भण्डारण कक्ष रहेको भवनमा डायलाइसिस कक्ष स्थानान्तरण गरिएको हो ।
बेनीका योगनाथ शर्माले फराकिलो भवनमा डायलाइसिस गराउन सहज भएको बताउनुभयो । थप स्वास्थ्यकर्मीलाई डायलाइसिस सेवा सञ्चालनसम्बन्धी तालिम, निर्माणाधीन भवनलाई पूर्णता दिएर त्यहीँबाट सेवा सञ्चालन गर्न र मृगौला रोगीहरूले एक पटक बिमा गरेर जीवनभर सेवा पाउने व्यवस्था मिलाउन आवश्यक रहेको शर्माले बताउनुभयो । रासस
