भेनेजुएलामा आएका दुई विनाशकारी भूकम्पमा ज्यान गुमाउनेहरूको संख्या बढेर १,४३० पुगेको छ।
राष्ट्रिय सभाका अध्यक्ष होर्खे रोड्रिगेजले एक टेलिभिजनमार्फत भूकम्पका कारण ३,२३८ जना घाइते भएको र ३,१४२ परिवार प्रत्यक्ष रूपमा प्रभावित भएको बताए।
बुधबार ७.२ र ७.५ म्याग्निच्युडका शक्तिशाली दुई भूकम्प केही सेकेन्डको अन्तरमा आएपछि हालसम्म देशभर ४३० वटा हल्कादेखि मध्यम स्तरका पराकम्प रेकर्ड गरिएको उनले जानकारी दिए।
रोड्रिगेजले भेनेजुएला सरकारका तर्फबाट ज्यान गुमाउने हजारौं पीडितप्रति गहिरो समवेदना व्यक्त गरे। उनका अनुसार अहिले पनि उद्धार तथा खोजी अभियानमा दशौं हजार उद्धारकर्मी दिनरात खटिरहेका छन्।
उनले प्रभावित क्षेत्रमा, विशेष गरी सबैभन्दा बढी प्रभावित ला ग्वाइरा राज्यमा, ७२ लाख किलोग्राम खाद्यान्न वितरण गरिएको जानकारी दिए।
साथै अस्पतालहरूमा ५,००० भन्दा बढी बिरामीको उपचार गरिएको र कुल स्वास्थ्य सेवा प्रदान गरिएको संख्या १२,००० पटकभन्दा बढी पुगेको बताए।
रोड्रिगेजका अनुसार ला ग्वाइरामा ६० प्रतिशत विद्युत् आपूर्ति पुनःस्थापित भइसकेको छ। केही क्षेत्रमा खानेपानी आपूर्तिमा पनि सुधार आएको छ। सडक खुलाउने तथा खोजी–उद्धार कार्यलाई तीव्र बनाउन सरकारले १०० भन्दा बढी हेभी मेसिन परिचालन गरेको छ।
हालसम्म २,२४२ जना अन्तर्राष्ट्रिय उद्धारकर्मी, ९६ वटा खोज तथा उद्धारका लागि तालिमप्राप्त कुकुर, १०३ टन उद्धार सामग्री तथा तीन टन औषधि भेनेजुएला आइपुगेको रोड्रिगेजले बताए।
सञ्चारमाध्यमका अनुसार राजधानी काराकास नजिक रहेको सिमोन बोलिभार अन्तर्राष्ट्रिय विमानस्थलले शनिबारदेखि आंशिक रूपमा सञ्चालन पुनः सुरु गरेको छ, जसबाट मानवीय सहायता बोकेका कार्गो उडानहरू सञ्चालन भइरहेका छन्। सीसीटीभीप्लस
