जेनजी समूह चितवनले आशिष सापकोटाको नेतृत्वमा जिल्ला प्रशासन कार्यालय चितवन अगाडि प्रदर्शन गरेको छ । गौरी बहादुर कार्की आयोगको प्रतिवेदन तत्काल सार्वजनिक गर्न माग गर्दै प्रदर्शन गरेका हुन् ।
आन्दोलनमा सहभागी युवाहरूले विगतका विभिन्न छानबिन आयोगका प्रतिवेदनहरू लुकाउने परिपाटीको अन्त्य हुनुपर्नेमा जोड दिएका छन्। भदौ २३ र २४ गतेको घटनासँग सम्बन्धित कार्की आयोगको प्रतिवेदन सार्वजनिक नगर्दा सत्यतथ्य जनतासम्म नपुगेको भन्दै उनीहरूले असन्तुष्टि व्यक्त गरेका छन्।
समूहका संयोजक सापकोटाले सरकारले पारदर्शिता अपनाउँदै प्रतिवेदन सार्वजनिक गर्नुपर्ने, दोषीमाथि कारबाही गर्नुपर्ने र पीडितलाई न्याय दिलाउनुपर्ने माग राखेका छन्। आन्दोलनकारीहरूले शान्तिपूर्ण प्रदर्शन गर्दै प्रशासनलाई ज्ञापनपत्र बुझाउने कार्यक्रमसमेत गरेका थिए। उनीहरूले आफ्ना माग पूरा नभए थप सशक्त आन्दोलन गर्ने चेतावनी दिएका छन्।
