चितवन, साउन ९-
देवघाटको तनहुँ तर्फ रहेको अस्थायी ट्राफिक प्रहरी पोष्टले सात लाख भन्दा बढी राजश्व संकलन गरेको छ । आर्थिक बर्ष २०७९/०८०मा ट्राफिक नियम उलङ्घन गर्नेहरुबाट ७ लाख ४ हजार ५ सय रुपैयाँ राजश्व संकलन गरेको हो ।
गत आर्थिक बर्षको बार्षिक प्रतिवेदन सार्वजनिक गर्दै अस्थायी पोष्टका प्रहरी सहायक हल्वदार बृद्धिराज महतोले हालसम्मकै सबैभन्दा बढी राजश्व संलकन गर्न सफल भएको जानकारी दिनुभयो । ‘देवघाटबाट एकैवर्षमा यति धेरै राजश्व संकलन भएको थिएन,’ उहाँले भन्नुभयो, ‘ट्राफिक प्रहरीको सक्रियता बढेसँगै राजश्व संकलनमा पनि वृद्धि भएको हो।’
पछिल्लो समय ट्राफिक नियम उल्लङ्घन गर्नेको संख्या बढेको उहाँले बताउनुभयो । उहाँका अनुसार सबैभन्दा धेरै मोटरसाइकल र स्कुटर नै कारवाहीमा परेका छन् । बर्षभरिको तथ्याङ्क हेर्दा ७ सय ६३ वटा मोटरसाइकल र स्कुटर ट्राफिक प्रहरीको कारवाहीमा परेका छन् । जसबाट पाँच लाख ४३ हजार रूपैयाँ राजश्व संकलन भएको छ ।
कार तथा जीपको कारवाहीबाट पनि ६८ हजार रूपैयाँ राजश्व संकलन भएको उहाँले बताउनुभयो । वर्षभरिमा १ सय १० वटा जीप तथा कार कारवाहीमा परेका थिए । सोही अवधिमा ६२ वटा ट्रक कारवाहीमा परेको र त्यसबाट मात्रै ४५ हजार रूपैयाँ राजश्व संकलन भएको उहाँले बताउनुभयो ।
यो अवधिमा ३८ वटा ट्याक्टरबाट ३१ हजार ५ सय रूपैयाँ, २६ वटा अटोबाट १६ हजार ५ सय रूपैयाँ राजश्व संकलन भएको उहाँले जानकारी दिनुभयो । यात्रुबहाक बस भने एउटा मात्रै कारवाहीमा परेको छ । जसबाट ५ सय रूपैयाँ राजश्व संकलन भएको छ ।
देवघाटमा सवारी साधनको चेकजाँचलाई कडायी बनाएपछि राजश्व संकलनमा बृद्धि भएको उहाँको भनाई छ । ‘यति सानो क्षेत्रमा वर्षमै यति धेरै राजश्व संकलन हुनु भनेको सामान्य कुरा होइन,’ प्रहरी सहायक हवल्दार महतोले भन्नुभयो, ‘हामीले राजश्व संकलनको लक्ष्य लिएर चेकजाँचमा कडाइ गरेका होइनौँ।’
