पूर्वमन्त्री एवम् राष्ट्रिय प्रजातन्त्र पार्टी (राप्रपा) का केन्द्रीय बरिष्ठ उपाध्यक्ष विक्रम पाण्डेले ५ वर्ष सरकार चलाउन दिए कायापलट गरि दिने दाबी गरेका छन् ।
राप्रपा जिल्ला कार्यसमिति चितवनको आयोजनामा आज (बुधबार) भएको अगुवा कार्यकर्ता भेटघाट कार्यक्रमलाई सम्बोधन गर्दै उनले यस्तो दाबी गरेका हुन् ।
उनले भने, ‘केबल ५ वर्ष यो देश चलाउन हामीलाई दिनुस् । ३० वर्ष बिगारेको यो देशलाई हामी पाँच वर्षमा बनाएर देखाइदिन्छौं । बिक्री गरेको कलकारखाना फिर्ता ल्याउँछौं । विदेशिएका युवाहरुलाई फिर्ता ल्याएर यो देश मै रोजगारी दिन्छौं । यो हाम्रो प्रतिबद्धता र मुल एजेन्डा हो ।’
चितवन क्षेत्रनम्बर ३ को उपनिर्वाचनमा निस्कलंकित उम्मेदवार जिवलाल पुरीलाई हलोमा भोट हालेर जिताउन पाण्डेले आग्रह गरे । ‘हाम्रो उम्मेदवारलाई जिताउन म आफै अनवरत रुपमा लागि परेको छु । किनकी अरु उम्मेदवार भन्दा हाम्रो उम्मेदवार धेरै कुराले राम्रो हुनुहुन्छ । निस्कलंकित, राष्ट्रवादी, सधै जनताको सेवामा समर्पित हाम्रो उमेद्वार हो । यसमा चितवनका तीनै क्षेत्रका व्यक्तिहरु लाग्न म अनुरोध गर्छु’, उनले आग्रह गरे ।
उम्मेदवारले प्रतिबद्धता गरेको हरेक कुरा पूरा गर्ने जिम्मेवारी आफूले पनि बहन गर्नेमा जोड दिए । उनले भने, ‘अपवित्र तरिकाले भोट नमाग्नु होला । कसैलाई व्यक्तिगत प्रलोभन दिएर भोट नमाग्नु होला । हामी यो राष्ट्र जोगाउँछौं । यो देशलाई शान्ति क्षेत्रको रुपमा अगाडि बढाउँछौं । विश्वको अगाडि नेपाल झुक्न पर्दैन । यो देशमै हामी सम्पूर्ण युवाहरुलाई रोजगारी दिलाउँछौं भने तपाइँहरु भन्नुस् त्यसको जवाफदेहिता हामी हुन्छौं । हाम्रो उम्मेदवारले गरेका प्रतिबद्धता हामी पूरा गर्छौं ।’
