राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले कान्छा राजनीतिक दलको भ्रममा नपर्न चितवनका मतदातालाई आग्रह गरेका छन् ।
राप्रपा जिल्ला कार्यसमिति चितवनको आयोजनामा आज (बुधबार) भएको अगुवा कार्यकर्ता भेटघाट कार्यक्रमलाई सम्बोधन गर्दै उनले यस्तो बताएका हुन् । उनले भने, ‘कहिलेकाहीँ बजारमा राम्रो वस्तु खोज्न जादा नक्कलीको फेला परिन्छ । त्यसको पछि लाग्दा समय पनि खेर जान्छ, पैसा पनि जान्छ । तपाइँहरुले यी कान्छा राजनीतिक दलहरुको फूर्तीफार्ती देखेर यी फरक हुन् भन्ने ठान्नुहोला, भ्रममा पर्न अनुरोध गर्दछु । नत्र चितवन क्षेत्र नम्बर २ का जनता तावाबाट उम्केर भुङ्ग्रोेमा पर्छन् ।’
उपनिर्वाचनले संसदको अंक गणितमा कुनै फरक नपार्नेमा लिङ्देलले जोड दिए । ‘यो चुनाव त्यसै हुँदैन, खर्च चाहिन्छ । यसलाई हाम्रो जस्तो सानो देशको अर्थतन्त्रले धान्न सक्दैन । आवधिक निर्वाचन नभएर यस प्रकारको उपनिर्वाचनहरु हुन थाल्यो भने देश संकटमा जान सक्छ । साथै हुन लागेको उपनिर्वाचनमा जुनसुकै दलले जिते पनि संसदको अंक गणितमा केही फरक पर्दैन’, उनले भने ।
यस्तै लिङ्देनले राजनीतिक नियुक्तिमा चल्ने अदालत र अख्तियारले न्याय दिन नसक्नेमा जोड दिए । उनले भने, ‘अदालतमा न्यायाधीशको नियुक्ति कसरी हुन्छ तपाइँलाई थाहा छ ? दलीय भागबन्डाको आधारमा हुन्छ । सरकारमा हुने दलका सबैभन्दा धेरै न्यायाधीश हुन्छन् जो मुख्य मुख्य पदमा रहन्छन् । राजनीतिक आधारमा जब न्यायाधीश नियुक्ति हुन्छ त्यो न्यायलयबाट तपाइँले कस्तो न्याय पाउनु हुन्छ ?’
आफ्नो आदेश अनुसार चल्ने प्रधानन्यायाधीश नहुँदा न्यायालय कामुमा चलिरहेकोमा उनले ध्यानाकर्षण गराए । ‘केही समय अगाडि एउटा न्यायाधीशले सरकारसँग टक्कर गर्न खोज्यो महाअभियोग लगायो । अहिले कामु प्रधानन्यायाधीशले न्यायालय सम्हालिरहेका छन् । कामु भएको यत्रो समयमा पनि उनी प्रधानन्याधीश बन्न सकेका छैनन् । यस्तो हुनुमा कामु प्रधान्यायाधीश बन्यो भने मेरो स्वार्थपूर्ण हुन्छ कि हुदैन । मेरो भनाइअनुसार काम हुन्छ कि हँुदैन भन्ने टुङ्गो लाग्दैन । अख्तियारमा पनि यसरी नै नियुक्ति हुन्छ । जतिसुकै राम्रो र बलियो भनेको मान्छे त्यहाँ पठाए पनि त्यो भागबन्डाको आधारमा गएको मान्छेले आफूलाई नियुक्ति गर्ने मान्छेलाई कारबाही गर्न सक्दैन । जसले प्रध्यानन्याधीश हुनपर्ने मान्छे कामुमै बिदा हुनुपर्ने अवस्था छ’, उनले गुनासो गरे । साथै राष्ट्रपतिलाई सपथ ग्रहण गराउन समेत कामु प्रधानन्याधीशले खुवाउनु परेकोमा लिङ्देनले दुःख व्यक्त गरे ।
सरकारले राष्ट्र बैंकमा विदेशी विनिमय छ भनेर गर्व गरिरहेकोमा चिन्ता व्यक्त गरे । उनले भने, ‘अहिले बढी गर्वका साथ प्रधानमन्त्री र यो सरकारका मान्छेहरु राष्ट्र बैँकमा विदेशी बिनिमय छ भन्छन् । एक वर्षसम्म चिन्ता गर्नुपर्दैन भन्छन् । त्यो पैसाको थुप्रो आयातामा रोक लगाएर भएको हो । अर्कोतर्फ हाम्रा युवाहरुले रगत पसिना गरेर पठाएको पैसा हो । आज देश युवा बेचेर चलाउनुपर्ने अवस्था छ । त्यसमा अढाइ लाखभन्दा बढी त दिदीबहिनीको संख्या छ । साथै यत्रो ठूलो जनप्रतिनिधिको संख्या देशले पाल्न सक्दैन । पाल्ने हो भने आजभोलि ढिलो चाडो देशले घुँडा टेक्छ ।’ यी तमाम समस्याको समाधानको विकल्प राष्ट्रिय प्रजातन्त्र पार्टी रहेको उनको दाबी थियो ।
