काठमाडौँ, माघ २०– जनता समाजवादी पार्टी, नेपालले निर्वाचनको समयमा पार्टीभित्र रहेर अन्तर्घात गर्ने, आधिकारिक उम्मेदवारविरुद्ध उम्मेदवारी दिने, निर्वाचनको समयमा निष्क्रिय रहने वा असहयोग गर्नेहरूलाई कारबाही गर्ने भएको छ ।
बारा जिल्ला समन्वय समितिको बैठकलाई सम्बोधन गर्ने क्रममा पार्टीका अध्यक्ष उपेन्द्र यादवले “निर्वाचनमा धोका दिने नेता कार्यकर्तालाई पार्टीमा कुनै स्थान नहुने” बताएका थिए ।
निर्वाचनमा भएका गतिविधिबारे छानबिन गर्न बनेको समितिले अन्तर्घातको आरोपितहरूलाई पत्र काटेरै स्पष्टीकरण लिन थालेपछि निर्वाचनमा अन्तर्घात गर्नेहरूप्रति जसपा कठोर बन्ने सङ्केत देखिएको छ ।
शिवलाल थापा संयोजकत्वको ५ सदस्यीय समितिले केन्द्रीय तहका नेताहरूको छानबिन गरिरहेको छ ।
