Breaking News
चितवन प्रशासनको जरिवाना रेकर्ड भद्रगोल, सहायक सिडियो भन्छन्ः ‘डाटा राख्नुपर्ने आवश्यकता छैन’
![Banner](https://narayanionline.com/wp-content/uploads/2020/08/CDO-Ofc-Chitwan.jpg)
प्रतिमा कुमाल
चितवन, असोज २५–
जिल्ला प्रशासन कार्यालय चितवनले बजार अनुगमन पछिको जरिवानाको विवरण सहि तरिकाले नराखेको पाईएको छ । कारबाही गरे अनुसार जरिवाना स्वरुप कति रकम उठ्यो भन्ने सहि तथ्याङ्क राखिएको छैन ।
बजार अनुगमन २०७८ भाद्रदेखि असोजसम्मको रेकर्ड फाइल नियाल्दा ८ लाख ५० हजार जरिवाना रकम उठेको देखिएको छ । प्रशासनमा भएको बैंक भौचरबाट यो विवरण निकालिएको हो । अनुगमनका क्रममा तोएिको एक लाख रुपैयाँ जरिवाना भने प्रशासनलाई तिरे/नतिरेको देखिएको छैन् । तर जिल्ला प्रशासन कार्यालय चितवन सहायक प्रमुख जिल्ला अधिकारी चिरन्जीवी शर्माले भने सो रकम भुक्तानी भैसकेको बताए । घरेलु तथा साना उद्योग अन्तरगत भएकाले सो रकम दिए/नदिएको रेकर्ड प्रशासनमा नदेखिएको उनको भनाइ छ ।
जिल्ला प्रशासन अन्तरगत पर्ने र घरेलु तथा साना उद्योग कार्यालय अन्तरगत पर्ने जरिवाना रकमको रेकर्ड एकै ठाउँ मिसाएर राखिएको छ । जसका कारण प्रशासन अन्तरगत पर्नेे अनुगमनबाट जरिवाना कति उठ्यो भन्ने देखिदैन् ।
प्रशासनले उपभोक्ता संरक्षण ऐन २०७५ अन्तरगत कारबाही गर्छ । प्रादेशिक व्यापार तथा व्यवसाय सम्बन्धी ऐन २०७६ अन्तरगत कारवाही घरेलु तथा साना उद्योग कार्यालयले हेर्छ ।
साथै शर्माले सिधै सरकारको खातामा जाने भएकाले डाटा नराखेको बताए । उनले भने, ‘अनियमितता, मिसावट सामान, अखाद्य वस्तु बिक्री वितरण भएको पाइएमा अवस्था हेरी कारवाही गर्ने, सुझाव दिने गरेका छौं । जति जरिवाना गरेका छौं व्यवसायीलाई त्यो रकम सिधै सरकारको खातामा जम्मा हुन्छ । हामी कहाँ एक रुपैयाँ आउँदैन । त्यसकारणले कार्यालयमा डाटा राख्नुपर्ने आवश्यक्ता छैन ।’
जिल्ला प्रशासन कार्यालय चितवन आर्थिक प्रशासन शाखाका रमेश रुवालीले जरिवाना कति संकलन हुन्छ भन्ने कुनै रेकर्ड राख्ने नगरेको बताए । उनले भने, ‘अहिलेसम्म बजार अनुगमनपछि जरिवाना कति संकलन भयो, प्रत्येक वर्ष कति संकलन हुन्छ भन्ने रेकर्ड राखेका छैनौं ।’
यस्तै यस अवधिमा प्रशासनले ३ जनालाई माफी दिएको छ । भरतपुर–१० सप्तगण्डकी बहुमुखी क्याम्पस अगाडिका ३ वटा पसललाई प्रशासनले ५–५ हजारको जरिवाना लगाएको थियो । उनीहरु साना व्यापारी र आगामि दिनमा त्यस्तो नगर्ने भनि प्रमुख जिल्ला अधिकारी अस्मान तामाङसंग क्षमा मागेपछि चेतावनीसहित माफी दिईएको प्रशासनले जनाएको छ ।
साथै गोरखनाथ किराना स्टोर्स पुतलीबजार भरतपुर–१ ले पनि एक लाखको माफी पाएको छ । समान खरिद गर्दा बिलको प्रयोग नगरी कर छली गरेको भन्दै प्रशासनले ३ लाख जरिवाना लगाएको थियो । ती मध्ये २ लाख स्टोर्सले बुझाई सकेको छ ।