पर्यटकीय क्षेत्र सौराहामा ८५ करोडको लगानीमा पाँचतारे लक्जरी रिसोर्ट ‘रोयल टुलिपु’ सञ्चालनमा आउने भएको छ । गैरआवासीय नेपाली तथा व्यवसायी रामेश्वर साहको लगानीमा उक्त रिसोर्ट सञ्चालन गर्न लागिएको हो । साहले अन्तर्राष्ट्रिय हस्पिटालिटी व्यवसायमा स्थापित फ्रान्सेली ब्राण्ड लुभ्र होटल्स ग्रुपसँगको सहकार्यमा रिसोर्ट सञ्चालन गर्न लागेका हुन् ।
उनको केटीएम हस्पिटालिटिमार्फत निर्माणाधीन ‘रोयल टुलिप रिसोर्ट’ डेढ वर्षअघि सौराहामा साधारण बुटिक रिसोर्टको रुपमा निर्माण सुरु भएको थियो । तर, काम गर्दै जाँदा पाँचतारे रिसोर्ट सञ्चालन गर्ने सोच बनेको साहले बताए ।
चितवनमा एउटै पनि पाँचतारे होटल तथा रिसोर्ट नरहेको र एउटै प्रकृतिका होटेल चल्ने र खुल्ने गरेकोले फरक खालको अन्तर्राष्ट्रिय चेन होटल सञ्चालन गर्न आफूले लगानी विस्तार गरेको साहले बताए ।
उनले भने, ‘अहिले ६४ कोठाको पाँचतारे रिसोर्टको निर्माणको कार्य हुँदैछ । अर्को बर्षको दशैंसम्म सञ्चालनमा ल्याउने योजनाका साथ कामहरु भइरहेको छ ।’ साहले थपे, ‘बहुर्राष्ट्रिय ब्रान्ड यहाँ यसको व्यवस्थापनको लागि आउँदै छ । यसरी ब्रान्डले व्यवस्थापन गरेको होटल चितवनमा एउटा चाहीं छ । तर त्यो पाँचतारे होइन् । हामीले निर्माण गरिरहेको पाँचतारे स्तरको रिसोर्ट हो ।’
कुल ३४ रोपनी क्षेत्रफलमा फैलिएको यो रिसोर्टमा २२ वटा भवनमा पाँच प्रकारका कोठाहरु हुनेछन् । चितवनमा लोकल ब्रान्डका होटलहरु मात्र रहेकोमा रोयल टुलिपु पहिलो विदेशी ब्रान्डको रिसोर्ट हुनेछ ।
रिसोर्टमा आगन्तुकले डुंगा सयर, जलमहलको बास, स्विमिङ पुल, हेल्थ क्लब, स्पा, चिल्ड्रेन पार्क, एमपी थियटर पदयात्रा मार्ग, आफ्नै बेकरी सहितको ग्रिल बार, रेष्टुरेण्ट र सांस्कृतिक कार्यक्रम जस्ता सेवाहरु पाउने छन् ।
केटिएम हस्पिटालिटिका अध्यक्ष साहले पर्यटन क्षेत्र सदैव नेपालीको अर्थतन्त्रको बलियो खम्बा भइरहँदा कोभिड महामारीले अकल्पनीय क्षति पुर्याएको बताए । यद्यपि नेपालमा पर्यटनको ठूलो संभावना रहेकाले गुणस्तरीय होटल तथा रिसोर्टहरुको धेरै आवश्यकता रहेको बताए ।
