इन्धनको मूल्य घटेसँगै सार्वजनिक सवारीसाधनको भाडा पनि घटेको छ ।
नेपाल आयल निगमले शनिवार डिजल र पेट्रोलको भाउ कम गर्ने निर्णय गरेपछि यात्रुवाहक र मालवाहक गाडीको भाडादर कम गरिएको हो । इन्धनको मूल्यअनुसार स्वचालित प्रणालीमार्फत भाडा परिवर्तन हुने व्यवस्थाअनुरुप यातायात व्यवस्था विभागले अन्तरप्रदेश यात्रुबाहक तथा मालबाहक यातायातमा भाडा घटाएको छ ।
यसअघि पटकपटक पेट्रोलियम पदार्थको भाडा बढ्दा भाडादर बढेको थियो । यातायात व्यवस्था विभागले यात्रुवाहक गाडीमा यसअघि कायम भाडादरभन्दा ५ दशमलब ४१ प्रतिशत भाडा कम गरेको छ । अहिले डिजल प्रतिलिटर २९ र पेट्रोल प्रतिलिटर २० रुपैयाँ कम भएकाले त्यसैका आधारमा भाडादर घटाउने निर्णय भएको विभागले जनाएको छ ।
पहाडी बाटोमा चल्ने मालवाहक गाडीमा ६ दशमलब ९७ प्रतिशत र तराईको बाटोमा सञ्चालन हुने मालवाहक गाडीमा ७ दशमलब ६८ प्रतिशत भाडा घटाइएको छ ।
वैज्ञानिक भाडा समायोजन प्रणालीमा इन्धनको मूल्य पाँच प्रतिशत वा त्योभन्दा बढीले घटेमा वा बढेमा स्वचालितरुपमा भाडादर परिवर्तन हुने उल्लेख छ । पछिल्लो पटक गएको असार ६ मा भाडादर समायोजन गरिएको थियो ।
नारायणगढबाट कहाँ जादा कति भाडा ?
यातायात व्यवस्था विभागले सार्वजनिक गरेको नयाँ सार्वजनिक सवारीको भाडा दरअनुसार नारायणगढबाट काँकटभिट्टा जाने भाडामा झण्डै १०० रुपैयाँले घटेको छ । एक हजार ३३६ पुगेको भाडादर अहिले घटेर एक हजार २६४ रुपैयाँमा झरेको छ । त्यसैगरी चितवनको गीतानगरबाट बर्दिया जाने बस भाडा एक हजार २४१ रुपैयाँ कायम भएको छ भने नारायणगढबाट कावासोती जाने भाडादर १०७ रुपैयाँ पुगेकोमा अहिले घटेर १०१ रुपैयाँ भएको छ । नारायणगढबाट पोखरा वालिङ ६२९ रुपैयाँ, नारायणगढ भैरहवा ४०१ रुपैयाँ, बेसिशहर ३४७ रुपैयाँ, पोखरा ३९० रुपैयाँ, वीरगन्ज ३७२ रुपैयाँ, बुटवल ३३० रुपैयाँ कायम भएको छ ।
