नेपाल क्रिकेट संघ (क्यान)ले ओमान भ्रमणका लागि एक खेलाडी थप गरेको छ । युवा स्पिनर सागर ढकाललाई समेट्दै क्यानले अन्तिम १७ सदस्यीय टोली घोषणा गरेको हो ।
पछिल्लो समय नेपाली घरेलु क्रिकेटमा लगातार उत्कृष्ट प्रदर्शन गर्दै आएका बायाँ हाते स्पिनर सागरलाई नेपालले चार देशसँग हुने टि२० आई सिरिजको लागि थपेको हो । सागर पहिलो पटक नेपाली सिनियर टोलीमा परेका छन् । सिरिजको प्रदर्शनपछि नेपालले टि२० विश्वकप खेल्ने अन्तिम १४ सदस्य टोली घोषणा गर्ने छ । गत असोजमा सम्पन्न एभरेष्ट प्रिमियर लिग (इपिएल)मा चितवन टाइगर्सलाई उपाधि जिताउन प्रतियोगितामा प्लेयर अफ द सिरिज (सर्वोत्कृष्ट) खेलाडी चुनिएका थिए ।
नेपाली टोली आजै राति ओमान प्रस्थान गर्दैछ । ओमान भ्रमणमा नेपालले आयरल्याण्ड, ओमान र युएईसंग टि–२० सिरिज खेल्ने छ । लगत्तै त्यसको ३ दिनपछि आइसीसी टि–२० विश्वकप ग्लोबल क्वालिफायर खेल्ने छ ।
