मौसम
हिउँमा फसेका १४ जना गाउँ फर्किए, केही तत्काल नफर्कने
काठमाण्डौ, माघ २५-
जुम्लाको पाटनमा जडीबुटी खोज्न जाँदा हिउँमा फसेकामध्ये १४ जना गाउँ फर्किएका छन् । फसेका ३४ ३५ जनामध्ये अहिलेसम्म १४ जना फर्किएको जुम्लाका प्रमुख जिल्ला अधिकारी विजया कुमारी प्रसाईँले जानकारी दिनुभयो ।बाक्लो हिउँ परेपछि फसेका उनीहरु हिजो घाम लागेर हिउँ पग्लिएपछि फर्किएका हुन् । बाँकी केही आज फर्किने तयारीमा रहेका छन् ।
भेडा तथा जडीबुटी समेत रहेका केहिले भने तत्काल फर्कने इच्छा नदेखाएका जिल्ला प्रशासन कार्यालय जुम्लाले जनाएको छ । उनीहरु तातोपानी गाउँपालिका वडा नम्बर ८ मा रहेको गाग्रा, ऐडी ओडार र खोटेसल्लामा बसेका छन् ।बाक्लो हिमपातपछि अस्ति उद्धारका लागि गएको हेलिकप्टर अवतरण हुन नसकेपछि खाद्यान्न खसालेर फर्किएको थियो ।यसैबीच, हिउँ खेल्न गएका गोरखाका दुई युवा हराएका छन् ।
बारपाक सुलिकोट गाउँपालिका–१ बारपाकका १६ वर्षीय करण घले र वडा नम्बर २ का १६ वर्षीय साइँला घले पाँच दिनदेखि परिवारको सम्पर्कमा नआएका हुन् । परिवारले उनीहरु हराएका र खोजीका लागि प्रहरीलाई अनुरोध गरेका छन् ।
परिवारको सूचनाका आधारमा खोजी थालिएको जिल्ला प्रहरी कार्यालय गोरखाका डीएसपी प्रकाश दाहालले बताउनुभयो । करण र साइँला गएको माघ २० गते लाप्राकमा हिउँ खेल्न भनेर हिँडेका परिवारले जानकारी दिएका छन् ।गएको बिहीवार र शुक्रवार देशका विभिन्न ठाउँमा वर्षासँगै हिमपात भएको थियो ।