सामाजिक संस्था नेपाल जर्नीले भरतपुर महानगरपालिका–४ छहारी बसपार्कमा नेपालकै नमुना नेपाल जर्नी अपागंमैत्री सार्वजनिक पुस्तकालय भवनको शिलान्यास गरेको छ ।
नेपाल जर्नीकी अमेरिका अध्यक्ष मौसमी श्रेष्ठको परिकल्पना अनुसार उनकै नेतृत्वमा पुस्ताकालय निर्माण हुन लागेको हो । सो पुस्तकालयको भरतपुर महानगरपालिकाकी प्रमुख रेनु दाहालले शिलान्यास गरिन् । सो क्रममा बोल्दै मेयर दाहालले मौसमी श्रेष्ठ र उनको टिमले नेपालकै नमुना नेपाल जर्नी अपागंमैत्री सार्वजनिक पुस्तकालय स्थापना गर्न लागेकाले महानगरका तर्फबाट २५ लाख रुपैया सहयोग प्रदान गर्ने घोषाणा गरिन् ।
२ वर्ष भित्रमै निर्माण सम्पन्न गर्ने गरी काम अगाडि बढाउन मेयर दाहालले आग्रह गरिन् । कार्यक्रममा एनआरएनए अन्तराष्ट्रिय समन्वय समितिका सचिव गौरी जोशी, एनआर एनए अमेरिका अध्यक्ष बुद्धिसागर सुबेदीसहितको एनआरएनए अमेरिका टिमले ३० लाख रुपैयाँ सहयोग गर्ने बताएको थियो ।
यो पुस्तकालय नेपालकै नमुना, ब्यवस्थित र बहुआयामिक हुने नेपाल जर्नी संस्थाकी अध्यक्ष श्रेष्ठले बताइन । देशमा भूकम्प गएका बेला नेपालमा रहँदा नेपालीमा परेको पीडाबाट दुखित भएर पीडामा परेकाहरुको हितका साथै देशमा शैक्षिक विकासका लागि काम गर्न आफूले अमेरिकामा संस्था स्थापना गरी देशमा ७ वटा पुस्तकालय निर्माण गरिसकेको श्रेष्ठले बताइन् ।
नेपाल जर्र्नी नेपाल टिमसँग सहकार्य गर्दै आफूले देशमा धेरै राम्रो परियोजनाहरु सुरु गरेको भन्दै उनले यो पुस्तकालय निर्माणमा स्थानीयको धेरै भन्दा धेरै सहभागिता र साथ रहनुपर्ने बताइन् ।
५ करोडको लागतमा २ वर्ष भित्र सक्ने गरी निमार्ण हुन लागेको पुस्तकालय नेपालकै नमुना हुने आर्थिक ब्यवस्थापन समिति अन्तर्राष्ट्रिय संयोजक राजिव श्रेष्ठले बताए ।
नेपाल र विदेशका दक्ष इन्जिनियरले डिजाइन गरेको पुस्तकालय भुइँतला र १ तला गरी ८ हजार इस्क्वाईर फिटमा निर्माण हुनेछ । अमेरिकामा रहेका नेपालीहरुले यो परियोजनालाई धेरै महत्वपूर्ण परियोजना मानेर यसको निर्माणका लागि सबै टिम सक्रिय पूर्वक लागेको अन्तर्राष्ट्रिय संयोजक भानु खरेलले बताए ।
‘नेपाल जर्नी संस्थाको शैक्षिक परिकल्पना, अपांगमैत्री सार्वजानिक पुस्तकालय स्थापना’ भन्ने मूल मन्त्रका साथ निर्माण थालेको यो पुस्तकालयमा कम्युटर ल्याब, बुक सेक्सन, योग हल, वेटिङ कक्ष, अध्ययन कक्ष, सेमिनार हल र अत्याधुनिक प्रोजेक्टरहरु लगायत विभिन्न युनिभर्सिटीका नयाँ तथा पुराना पुस्तकहरु हुनेछन् । भवनमा एलिभेटरको माध्यमबाट सजिलै तलमाथि जान सकिनेछ ।
कार्यक्रममा वरिष्ठ उत्प्रेरक विजयराज सिग्देल, भरतपुर महानगरका प्रवक्ता अरुणपीडित भण्डारी, वडा नम्बर ४ का अध्यक्ष हरिप्रसाद आचार्य, चितवन उद्योग संघका अध्यक्ष त्रिलोचन कँंडेल, अपांग जागरण अभियानका अध्यक्ष अम्बिकालाल श्रेष्ठ, नेपाल जर्नी संस्थाका महासचिव धनकुमार श्रेष्ठलगायतले मन्तव्य व्यक्त गरेका थिए ।
भवन निर्माणका लागी स्थानीय सामाजिक अगुवा शिव लामिछानेको संयोजकत्वमा निर्माण समिति समेत चयन गरिएको छ । नेपाल जर्नी संस्थाका नेपाल अध्यक्ष प्रकाश सिग्देलको अध्यक्षतामा कार्यक्रम सम्पन्न भएको थियो ।
