नेकपा (एकीकृत समाजवादी)की सचिव रामकुमारी झाक्रीले तत्काल कुनै पार्टीसंग एकता नहुने बताएकी छन् ।
चितवनको रत्ननगरमा आज (आइतबार) आयोजित रत्ननगर कमिटी घोषणा सभालाई सम्बोधन गर्दै नेतृ झाक्रीले बामहरुबीच छुट्टै ध्रुविकरणको आवश्यकता रहेको बताउँदै तत्कालै एमाले वा माओवादीसंग भने पार्टी एकता संभव नभएको बताइन् ।
उनले बाम ध्रविकरणका लागि सैद्धान्तिक अवधारणा र लोकतान्त्रिक प्रगतिशिल शक्तिहरुबीचको आगामि दिनको संयुक्त मोर्चा बारेमा ठोस निर्णय पार्टीको राष्ट्रिय सम्मेलन मार्फत टुंगो लगाउनुपर्ने जोड दिइन् ।
एमाले भित्र रहँदादेखि नै केपी ओलीको कट्टु आलोचक रहेकी नेतृ झाक्रीले कार्यक्रममा पुरै केपी ओलीविरुद्ध खनिइन् । केपी ओलीलाई ब्राण्डको रुपमा प्रस्तुत गर्न खोजिएको भन्दै उनले त्यो नक्कली र विषाक्त ब्राण्ड हुने बताइन् ।
उनले केपी ओलीको ठूलाठूला व्यानर, मोजा, टिसर्ट, पानीका बोत्तल, ट्वाइलेट पेपरमा समेत फोटो टाँसेर ब्राण्ड बनाउन खोजेको भन्दै त्यो भ्रष्टचारको उदाहरण भएको आरोप लगाइन् ।
