नेपाली कांग्रेसको १४औँ महाधिवेशन अन्तरगत चितवनको इच्छाकामना गाउँपालिकाको सभापतिमा दुई जनाको उम्मेद्वारी परेको छ ।
शनिबार भएको निर्वाचन प्रक्रियामा सभापतिका लागि विष्णु कुमार कुवँर र कृतिकुमार श्रेष्ठले उम्मेद्वारी दर्ता गराएको मतदान अधिकृत हरिहर दवाडीले नारायणी अनलाइनलाई जानकारी दिए । यस्तै दुई जना उपसभापतिका लागि ७ जना र २ जना सचिवका लागि ६ जनाले उम्मेद्वारी दर्ता गराएको दवाडीले जानकारी दिए ।
उनले दुवै उम्मेद्वारले सहमतिका लागि छलफल गरिरहेको र मतदान बारे टुंगो नलागेको बताए । ‘सहमतिको प्रयास भइरहेको छ, आजै मतदान गराउन सकिने संभावना कम देखिन्छ’–दवाडीले भने ।
इच्छाकामनामा कुल ३५ जनाको पद रहेको छ । यहाँ कुल १३३ जना मतदाता रहेका छन् ।
