सन् २०२२ मा कतारमा हुने विश्वकप छनोट अन्तरगतको एसिायली क्षेत्रको संयुक्त छनोट खेलको दोस्रो चरणको खेल आजदेखि सुरु हुँदैछ । आज पहिलो दिन नेपालले चाइनिज ताइपेईसंग प्रतिस्पर्धा गर्दैछ । यस्तै सोही समयमा अष्ट्रेलिया र घरेलु टोली कुवेतबीच पनि खेल हुँदैछ । नेपालको खेल राति ९ः४५ बजेदेखि सुरु हुँदैछ । सो खेलको कान्तिपुर टिभीले प्रत्यक्ष प्रशारण गर्दैछ ।
पहिलो चरणको खेलमा नेपालले चाइनिज ताइपेइलाई पराजित गर्दै ३ अंक जोडेको थियो । अहिलेसम्मको अवस्थामा चाइनिज ताइपेइसँग खेलेका दुई खेलमा नेपाल अपराजित छ । यसअघि एक मैत्रीपूर्ण खेलमा नेपाल र चाइनिज ताइपेइले बराबरीको नतिजा निकालेको थियो ।
नेपाल र चाइनिज ताइपेई पहिलो पटक भिड्दा अभिषेक रिजालले डेब्यु गोल गरेका थिए । यस्तै २०१९ मा भएको विश्वकप छनोटमा नेपालले जित्दा अन्जन विष्टले दुवै गोल गरेका थिए । अहिले दुवै जना नेपाली टोलीसँगै कुवेतमा छन् ।
फिफा वरीयतामा चाइनिज ताइपेई नेपालभन्दा ३० स्थान माथि छ । फिफाले पछिल्लो पटक जारी गरेको वरीयतामा नेपाल १७१ औं स्थानमा छ । चाइनिज ताइपेई १४१ औं स्थानमा छ । यस प्रतियोगितामा नेपाल उत्कृष्ट चौथो टिम बन्न सके २०२३ मा चीनमा हुने एसिया कपको तेस्रो चरणमा प्रवेश गर्नेछ । त्यसैले आजको जित नेपालका लागि महत्वपूर्ण छ ।
कुवेतमा सुरु हुन लागेको समूह बीको छनोट खेलमा नेपालसँगै अष्ट्रेलिया, जोर्डन, कुवेत र चाइनिज ताइपेईले प्रतिस्पर्धा गर्नेछन् ।
