जिल्ला प्रशासन कार्यालय चितवनले कोभिड–१९ नियन्त्रणका लागि सरकारले जारी गरेको आदेशलाई प्रभावकारी रुपमा कार्यान्वयन गर्न सबैमा अनुरोध गरेको छ । विहीबार एक सूचना जारी गर्दै चितवन प्रशासनले १३ बुँदे निर्देशन पालना गर्न अनुरोध गरेको छ ।
प्रशासनले भरतपुर महानगर बाहेकका स्थानीय तह अन्तरगतका विद्यालयहरुलाई एसइई बाहेकका सबै परीक्षाहरु वैशाख मसान्तभित्र सक्न निर्देशन दिएको छ । भरतपुर महानगरभित्रका विद्यालय तथा कलेजहरु सरकारले निर्णय गरेदेखि नै बन्द छन् ।
त्यस्तै सभा, सम्मेलन, गोष्ठी, समीक्षा बैठक, तालिम जस्ता क्रियाकलाप संचालन गर्दा भर्चुअल माध्यमबाट गर्न आग्रह गरेको छ भने भौतिक उपस्थिति अनिवार्य भएमा २५ जना भन्दा बढी उपस्थित नहुने गरी गर्न आग्रह गरेको छ । पसल तथा सार्वजनिक स्थानमा स्यानिटाइजर र मास्क अनिवार्य मास्क प्रयोग गर्ने, कुनै व्यक्तिले मास्क नलगाई आएमा व्यवस्थापकले बढीमा १० रुपैयाँ लिई मास्क उपलब्ध गराउने, मास्क नलगाउने व्यक्तिलाई कार्यालय वा पसलमा प्रवेश नगर्न नदिन प्रशासनको आग्रह छ ।
