जिल्लामा कोरोना सङ्क्रमणका कारण मृत्यु हुनेको सङ्ख्या सय पुगेको छ । स्वास्थ्य कार्यालय चितवनका अनुसार जिल्लाका विभिन्न अस्पतालमा उपचारका क्रममा र होम आइसोलेशनमा रहेको समयमा मृत्यु हुनेको सङ्ख्या सय पुगेको हो । मृत्यु हुनेमा भरतपुर महानगरपालिकाका ६०, खैरहनी नगरपालिकाका नौ, माडीका एक, रत्ननगरका १३, राप्तीका आठ, कालिका नगरपालिकाका आठ र इच्छाकामना गाउँपालिकाका एक जना रहेको कार्यालयले जनाएको छ ।
जिल्लाका दुई ठूला मेडिकल कलेज, एक सरकारी अस्पताल र पुष्पाञ्जली अस्पतालमा उपचार गरिँदै आएको छ । यस्तै जिल्लामा सङ्क्रमितको सङ्ख्या छ हजार १६२ पुगेको छ । सङ्क्रमितमध्ये भरतपुर महानगरपालिकाका चार हजार ३८६, खैरहनी नगरपालिकाका ३९४, माडीका ११७, रत्ननगरका ७४०, राप्तीका ३०६, कालिका नगरपालिकाका १८३ र इच्छाकामना गाउँपालिकाका ३६ जना छन् जसमध्ये पाँच हजार ७१५ जना सङ्क्रमण मुक्त भइसकेका छन् भने ३४७ जना विभिन्न आइसोलेशनमा रहेका छन् । रासस
