सत्याग्रहमा रहेका डा. गाेविन्द केसीको पक्षले बिहीबार भएका सहमतिबाट पनि सरकार पछि हटेको आरोप लगाउँदै आन्दोलनमा उत्रिएको छ ।
साेलिडारिटी फर गोविन्द केसीको आयोजनामा माइतीघरमा प्रदर्शन भएको हो। अलायन्सले मुलुकका विभिन्न ठाउँमा पनि प्रदर्शन जारी राखेकाे छ ।
प्रदर्शनकारीले डा. केसीका माग पूरा गरेर उनको जीवन रक्षा गर्न माग गरिएका प्लेकार्ड बोकेका छन् ।
डा. केसी १९ औँ सत्याग्रहमा बसेको बुधबार २७ दिन भयो । सरकार र गोविन्द केसीको तर्फबाट वार्ता टोली गठन भएको छ । वार्ता भए पनि सहमतिमा पुग्न सकेको छैन ।
यसैबीच शिक्षामन्त्री पोखरेलले डा. केसीका मागहरुबारे प्रधानमन्त्री केपी शर्मा ओलीसँग छलफल गर्न सरकारी वार्ता टोली लिएर बालुवाटार गएका छन् ।
माइतीघरमा भएको प्रदर्शनमा ‘माफियाको समाजवाद, यती, ओम्नी, मार्सी भात’, ‘सत्याग्रही मार्न खोज्ने सरकार धेरै दिन टिक्दैन’, ‘डा केसीको माग पूरा गर’, ‘दूरदराजमा मेडिकल शिक्षा खै?’ लगायतका नारा लगाएका छन्।
