अमेरिकाको पश्चिम न्यूर्योकमा बफेलो शहरमा दुई प्रहरी अधिकारीले ७५ वर्षका एक वृद्धलाई धकेलेर लडाएको भिडियो भाइरल भएको छ ।
जर्ज फ्लोइडको हत्याको विरोध तथा न्यायको माग गर्दै भएको प्रदर्शन नियन्त्रणका लागि न्यूर्योकको दोस्रो ठूलो शहर बफेलोमा कर्फ्यू जारी गरिएको थियो । स्थानीय समय अनुसार बिहीबार राति ८ बजेपछि कर्फ्यू कार्यान्वयनका लागि खटिएका अस्त्र युक्त दुई प्रहरीले ७५ वर्षका वृद्धलाई धकेलेर लडाएका हुन् ।
लडेका ती वृद्धको टाउको गम्भीर चोट लाग्यो । रगत बग्यो, उनी बेहोस भए । धकेल्ने प्रहरी अघि बढे । अरु सुरक्षाकर्मी आएर उनलाई उठाए ।
ती वृद्धको हाल स्थानीय अस्पतालमा उपचार भइरहेको अमेरिकी सञ्चारमाध्यमले जनाएका छन् । उनको अवस्था गम्भीर तर स्थिर रहेको जनाइएको छ ।
बफेलो शहरका मेयर बायरन ब्राउनले वक्तव्य जारी गरेर घटनाप्रति गम्भीर दुःख व्यक्त गर्दै ती वृद्धलाई धकेल्ने दुई प्रहरी अधिकारीलाई निलम्बित गरिएको जानकारी दिएका छन् ।
न्यूर्योक राज्यका गभर्नर एन्ड्रयू कुओमोले घटनाको गम्भीर निन्दा गर्दै बफेलोमा भएको घटना पूर्णरुपमा अनुचित र अपमानजनक रहेको बताएका छन् ।
