वाग्मती प्रदेश सरकारले प्रदेशको आगामी बजेट अधिवेशनमा पेस गरिने नीति तथा कार्यक्रममा कोरोनाले पारेको असरलाई दृष्टिगत गरी कृषि क्षेत्र र स्वास्थ्य क्षेत्रमा परिवर्तन देखिने कार्यक्रम ल्याउने आर्थिक मामिला तथा योजनामन्त्री कैलास ढुङ्गेलले बताउनुभएको छ ।
मन्त्री ढुङ्गेलले आगामी बजेटमा कृषि क्षेत्रको आधुनिकीकरण, कृषिमा आधारित बनको विकास, यान्त्रिकीकरण गर्ने, कृषि उत्पादन वृद्धि गर्न अनुदान रकम दिने नीतिभन्दा साना कृषकलाई शून्य ब्याज दरमा ऋण दिने, मध्यमस्तरका कृषकलाई २.३ प्रतिशत ब्याजदर ऋण दिने, ठूला कृषकलाई सहुलीयत ब्याज दरमा ऋण सरलीकरण प्रक्रियाबाट उपलब्ध गराउने विषयमा प्राथमिकता दिइने बताउनुभयो ।
उहाँले कृषिमा बढीभन्दा बढी जनतालाई रोजगारीतर्फ उन्मुख गराउने बजेटको व्यवस्था गर्ने बताउनु हुँदै वाग्मती प्रदेशको सबै जिल्लाका सरकारी अस्पताल साधन तथा सुविधा सम्पन्न उपचार गर्न सक्षम हुने किसिमले स्तरोन्नति गर्ने र सक्षम जनशक्ति उत्पादन र व्यवस्थापन गर्ने स्वास्थ्य क्षेत्रको विकासमा प्राथमिकता दिने बताउनुभएको छ ।
