नेपाली काँग्रेस वागमती प्रदेशका संसदीय दलका नेता तथा प्रदेश सभा सदस्य इन्द्रबहादुर बानियाँले कोरोना भाइरस (कोभिड–१९)विरुद्ध लड्नका लागि मकवानपुरका विभिन्न कोषमा पाँच लाख रुपैयाँ सहयोग गर्ने घोषणा गरेका छन् ।
आज (शुक्रबार) एक विज्ञप्ती जारी गर्दै सांसद बानियाँले मकवानपुरका तीन गाउँपालिकाको विपद् व्यवस्थपन कोषमा पाँच लाख रुपैयाँ सहयोग गर्ने घोषणा गरेका हुन् । सांसद बानियाँले राक्सिराङ गाउँपालिकाले बैंक अफ काठमाडौं राक्सिराङ शाखामा स्थापना गरेको विपद् व्यवस्थापन कोषमा तत्काल दुई लाख रुपैयाँ सहयोग गर्ने घोषणा गरेका छन् । गाउँपालिकाले यस कोषमा स्वंम २५ लाख रुपैयाँ जम्मा गरि सकेको छ । यस गाउँपालिकामा विपन्न चेपाङ, दलित तथा तामाङसहितका जनजाति समुदायको बाहुल्यता रहेको छ । यस गाउँपालिकाले आर्थिक अवस्थालाई मध्यनजर गर्दै कोरोना भाइरस (कोभिड–१९) संक्रमणको उपचारका लागि निःशुल्क एम्बुलेन्स सेवा र थप परीक्षणका लागि नेपाल सरकारले तोकेका अस्पताल जानुपरेमा प्रति बिरामी पाँच हजार रुपैयाँ दिने घोषणा गरि सकेको छ ।
यस्तै सांसद बानियाँले कैलाश गाउँपालिकालाई दुई लाख र मनहरी गाउँपालिकालाई एक लाख रुपैयाँ सहयोग गर्ने घोषणा गरेका छन् ।
त्यस्तै सांसद बानियाँले वागमती प्रदेशभर विपन्न वर्ग, लोपोन्मुख बनकरीया, सिमान्तकृत चेपाङलगायत दैनिक श्रमगरी खाने असंगठित श्रमिक र जनजाति समुदायलाई लकडाउनमा माहामारीविरुद्ध लड्न भोकोपेटले नसक्ने भन्दै तत्काल अत्यावश्यक खाद्य सामग्री उपलब्ध गराउन संघीय र प्रदेश सरकारको ध्यानाकर्षण गराएका छन् ।
