चितवनका अस्पतालहरुमा बिरामीको संख्या ह्वातै घटेको छ । सरकारले जारी गरेको एकहप्ते लकडाउन र कोरोनाको त्रासका कारणले बिरामीहरु अस्पतालसम्म आउन छाडेका छन्।
दैनिक १२ सयभन्दा बढी बहिरंग विभागमा उपचारका लागि भरतपुर आउने बिरामीहरू निकै घटेको भरतपुर अस्पतालका सूचना अधिकारी लिलाधर पौडेलले जानकारी दिए । बुधबार अस्पतालमा जम्मा १२ जना मात्रै बिरामीले ओपिडी सेवा लिएको उनले बताए । अधिकारीले ज्वरोका बिरामीका लागि मात्रै ‘ज्वरो क्लिनिक’ सञ्चालन गरिएको बताए । अस्पतालको १४ बेड आइसोलेसनमा अहिले कोही पनि नराखिएको उनले बताए । यस्तै, दैनिक ६ सयको हाराहारीमा बिरामी आउने पुरानो मेडिकल कलेजमा ५० जना, चितवन मेडिकल कलेजमा ३६ जना बिरामी आए ।
अन्य निजी अस्पतालहरुमा नगन्य मात्रामा मात्रै बिरामीहरु उपचारका लागि पुगेका छन् ।
