ब्रिटिस एयरलाइन्सले बुधबारदेखि आफ्नो सबै उडान चीनमा बन्द गरेको छ । कोरोनाभाइरसको संक्रमण नघटेपछि ब्रिटिस एयरलाइन्सले आगामी मार्चसम्म चीनमा उडान नभर्ने जनाएको छ ।
भाइरस सङ्क्रमितहरूको सङ्ख्या ह्वात्तै बढेको अधिकारीहरूले पुष्टि गरेका छन् ।
एयरलाइन्सले लन्डनबाट सिधा बेइजिङ र सांघाईका बुकिङसमेत बन्द गरेको छ । त्यहाँको अवस्था सामान्य नभएसम्म उडान नभर्ने जनाएको छ ।
चीनमा अहिलेसम्म कोरोनाभाइरसले १३२ जनाको मृत्यु र ६ हजार बढी संक्रमित भइसकेका छन् । चीनले वुहान सहर बन्द गरेर संक्रमितको उपचार गरिरहेको छ ।
अस्ट्रेलियाले आफ्ना नागरिकहरूलाई क्रिसमस टापु पुर्याएर उनीहरूको स्वास्थ्य जाँच गरेपछि मात्र घर फर्कन दिने योजना बनाएको छ।
चीनबाट फैलिएको कोरोनाभाइरस अमेरिका, जापान, अफ्रिकाका देशमा समेत देखिइसकेको छ । बुधबार मात्रै अस्ट्रेलिया र युएईमा कोरोनाभाइरस व्यक्तिमा संक्रमण भएको पुष्टि भएको छ ।
यस्तै, चीनमा अहिले ७,००० को आसपास नेपाली नागरिक रहेको नेपाली दूतावास बेइजिङको भनाइ छ ।
तीमध्ये भाइरस प्रभावित हुबेको वुहान वरपर करिब १०० नेपाली रहेका छन् ।
सङ्क्रमण फैलिएपछि केही दिनअघि वुहानमा मृत्यु भएका एक नेपालीको शव समेत नेपाल फिर्ता ल्याउन नसकिएको स्रोतले जनाएको छ ।
