साग पुरुष क्रिकेट अन्तरगत नेपाली टोली बंगलादेश यु २३ संग ४४ रनले पराजित भएको छ । बंगलादेशले दिएको १५६ रनको लक्ष्य पछ्याएको नेपाल ९ विकेटको क्षतिमा १११ रन मात्रै जोड्न सक्यो । यो संगै सागमा क्रिकेट तर्फ स्वर्ण पदक जित्ने नेपालको सपना तुहिएको छ ।
नेपालको ओपनिङ व्याटिङ आज पनि चलेन । पूर्व कप्तान पारस खड्का ९ रनमा मात्रै आउट भए । नेपालका लागि कप्तान ज्ञानेन्द्र मल्लले सर्वाधिक ४३ रन बनाए । यस्तै अभिनास बोहराले १३, दीपेन्द्र सिंह ऐरीले १६ रन बनाए भने अन्य व्याट्सम्यानले दोहोरो अंक जोड्न सकेनन् ।
यसअघि टस जितेर नेपालले फिल्डिङ रोजेपछि व्याटिङ गरेको बंगलादेश निर्धारित ओभरमा ६ विकेट गुमाउँदै १५५ रन जोड्यो । उसका लागि कप्तान नजमुल हुसेन सान्टोले अविजित ७५ र अफिफ होसेनले ५२ रन जोडे ।
नेपालका लागि पारस खड्काले ३, दीपेन्द्र सिंह ऐरीले २ र अभिनास बोहराले एक विकेट लिए ।
