आउँदो मंसिर १४ गते हुन लागेको उपनिर्वाचनको लागि चितवनमा तयारी तीव्र पारिएको छ ।
जिल्ला निर्वाचन कार्यालयले उपनिर्वाचनको सबै तयारी तीव्र पारेको हो । उपनिर्वाचनलाई शान्तिपूर्ण र छिटो सम्पन्न गर्न १३५ जना कर्मचारीलाई खटाउने तयारी गरिएको छ । ७५ जना कर्मचारी जिल्ला तहबाट र बाँकी स्थानीयस्तरबाट कर्मचारी खटाइने जिल्ला निर्वाचन कार्यालय चितवनका प्रमुख हरिप्रसाद ढकालले नारायणी अनलाइनलाई जानकारी दिए । उनले सुरक्षाकर्मी बाहेक ती कर्मचारी खटाउन लागिएको बताए ।
उपनिर्वाचन हुने तीन वटा वडाका लागि सत्तारुढ दल नेपाल कम्युनिष्ट पार्टी (नेकपा) र प्रमुख प्रतिपक्षी दल नेपाली काँग्रेसले उम्मेद्वार तय गरि सकेको छ ।
नेकपाले भरतपुर–१६ मा भक्तराज हमाल, खैरहनी–४ मा वेदबहादुर अधिकारी र खैरहनी–५ मा पुननारायण प्रधानलाई उम्मेद्वार बनाएको छ । यस्तै नेपाली काँग्रेसले भरतपुर–१६ मा अमृत हमाल, खैरहनी–४ मा देवबहादुर बस्नेत र खैरहनी–५ मा प्रतिमा कार्की बस्नेतलाई उम्मेद्वार बनाएको छ ।
