चितवनको पर्यटकीय क्षेत्र सौराहा प्रवेशद्धारमा ‘रोटरी घण्टाघर’ बन्ने भएको छ ।
सामाजिक क्षेत्रमा महत्वपूर्ण भूमिका निर्वाह गर्दै आइरहेको रोटरी क्लव अफ रत्ननगरले ‘घण्टाघर’ निर्माण गर्न लागेको हो । आज (बुधबार) एक कार्यक्रमकाबीच सौराहा प्रवेशद्धार रत्ननगर–७ सिसुवार चोकमा ‘रोटरी घण्टाघर’को शिलन्यास समेत गरिएको हो । घण्टाघरको रोटरीका डिष्ट्रिक्ट गर्भनर किरणलाल श्रेष्ठले शिलन्यास गरे ।
रोटरीले २५ लाख रुपैयाँको लागतमा ‘घण्टाघर’ निर्माण गर्न लागेको हो । सो घण्टाघर जमिनदेखी ४० फिट उचाइको हुने क्लवका अध्यक्ष विपिन पोखरेलले जानकारी दिए । सो घण्टाघर माघ मसान्त भित्रमा निर्माण सम्पन्न गरी वडालाई हस्तान्तरण गर्ने तयारी गरिएको छ । घण्टाघरलाई नमुनाको रुपमा निर्माण गरिने छ । चितवनमा घण्टाघर निर्माण हुन लागेको यो पहिलोपटक हो ।
रोटरी क्लव अफ रत्ननगरले यसअघि टिकौलीमा सार्वजनिक शौचालय पनि निर्माण गरेको छ । औपचारिक कार्यक्रम क्लवका अध्यक्ष विपिन पोखरेलको अध्यक्षतामा सम्पन्न भएको थियो ।
