प्रथम मिस्टर एण्ड मिस मुवा थाई प्रतियोगिताअन्तर्गत पहिलो चरणमा खेलाडी छनौट भएको छ ।
नेपाल राष्ट्रिय मुवा थाई संघको आयोजना तथा चितवन मुवा थाई संघको समन्वयमा सुरु भएको मिस्टर एण्ड मिस मुवा थाईमा देशभरीका उत्कृष्ट खेलाडीहरु सहभागी छन् । प्रतियोगितामा पुरुष तर्फ ५०, ५५, ६०, ६५ र ७० किलो तौल समूहमा खेलाडीहरु सहभागी छन् भने महिला तर्फ ५१ र ५६ किलो तौल समूहमा सहभागी छन् ।
प्रतियोगिताको दोस्रो चरणमा खेलाडीबीचमा फाइट गराइने नेपाल राष्ट्रिय मुवा थाई संघका अध्यक्ष गणेशलाल कक्षपतीले जानकारी दिए । प्र्रत्येक तौल समूहबाट उत्कृष्ट दुई जना छनौट गरी काठमाडौंमा फाइनल प्रतिस्पर्धा गराइने कक्षपतीले बताए । प्रत्येक तौल समूहबाट विजेता खेलाडीमध्ये भोटिङबाट मिस्टर मुवा थाई र मिस मुवा थाई छनौट गरिने कक्षपतीले बताए । खेलको माध्यमबाट व्यक्तित्व विकास, खेलाडीको नेतृत्व विकास, खेलाडीबीच मित्रता बढाउने तथा खेलको लोकप्रियता बढाउनका लागि प्रतियोगिताको आयोजना गरिएको चितवन मुवा थाई संघका अध्यक्ष उत्तम गुरुङले बताए । सो प्रतियोगितामा पाँच जना महिला तथा २२ जना पुरुष मुवा थाई खेलाडीहरु सहभागी छन् । कार्यक्रममा उनीहरुको फोटो सेसन पनि गरिएको छ ।
चितवन, असार १४-
