आसन्न चाडपर्वलाई लक्षित गर्दै बजार व्यवस्थापन, शान्ति–सुरक्षा तथा बजार अनुगमनलाई प्रभावकारी बनाउने सम्बन्धमा शुक्रबार चितवन उद्योग वाणिज्य संघको सचिवालयमा बैठक सम्पन्न भएको छ।
भरतपुर महानगरपालिकाका प्रमुख तथा प्रमुख जिल्ला अधिकारीको संरक्षकत्वमा गठित बजार व्यवस्थापन टास्क फोर्सका संयोजक एवं चितवन उद्योग वाणिज्य संघका वरिष्ठ उपाध्यक्ष राजेन्द्र ओलीको अध्यक्षतामा बैठक बसेको थियो।
चाडपर्वका बेला बजारमा हुनसक्ने अवाञ्छित गतिविधि नियन्त्रण गर्न, उपभोक्ताको हित संरक्षण गर्न तथा सर्वसाधारणको आवतजावत सहज बनाउन बैठकले विभिन्न निर्णय गरेको छ ।
चाडपर्वका समयमा जथाभावी रूपमा सञ्चालन हुने ठेला तथा पोके व्यापारलाई तोकिएको स्थान र मापदण्डअनुसार व्यवस्थित गर्ने निर्णय भएको छ ।
उपभोक्तालाई गुणस्तरीय वस्तु तथा सेवा उचित मूल्यमा उपलब्ध गराउन नियमित र प्रभावकारी बजार अनुगमन गर्ने र चाडपर्वमा बढ्ने सवारी चाप र भिडभाड नियन्त्रण गर्न ट्राफिक व्यवस्थापनलाई चुस्तदुरुस्त बनाउने निर्णय भएको छ ।
चितवनमा सञ्चालित अटोरिक्साको दर्ता प्रक्रिया, कुल संख्या निर्धारण तथा पार्किङ व्यवस्थापनका लागि भरतपुर महानगरपालिकाको यातायात विभागमा पहल गर्ने बताइएको छ ।
बैठकमा संघका उपाध्यक्षहरू त्रय नारायण प्रधान, जनक पौडेल र राजन पिया, जिल्ला ट्राफिक प्रहरी कार्यालयका प्रतिनिधि विष्णु थापा, वडा प्रहरी कार्यालयका प्रमुख कुशराम कार्की, भरतपुर महानगरपालिका यातायात विभागका प्रमुख प्रह्लाद कार्की, बजार व्यवस्थापन टास्क फोर्सका सदस्यहरू तथा चितवन उद्योग वाणिज्य संघको बजार व्यवस्थापन समितिका सदस्यहरूको सहभागिता रहेको थियो।
सर्वसाधारण तथा उपभोक्ताले सहज, सुरक्षित र सुलभ रूपमा चाडपर्व मनाउन सक्ने वातावरण सिर्जना गर्न आगामी दिनमा अनुगमन तथा व्यवस्थापनका कार्यलाई तीव्रताका साथ अगाडि बढाइने टास्क फोर्सले जनाएको छ। साथै, चाडपर्वको अवधिमा बजार व्यवस्थापनमा सहयोग गर्न टास्क फोर्सले सम्पूर्ण व्यवसायी तथा सर्वसाधारणमा अनुरोध गरेको छ।
