भरतपुर महानगरपालिका–२२ पटिहानीस्थित सहनशिला बुहारी ग्रुपले भरतपुर महानगरपालिका–२९ कमलपुरमा रहेको श्री राष्ट्रिय आधारभूत विद्यालयका चेपाङ तथा दलित समुदायका बालबालिकालाई विद्यालय पोसाक र स्टेशनरी सामग्री वितरण गरेको छ । बिहीबार आयोजित कार्यक्रममा विद्यालयमा अध्ययनरत १८ जना विद्यार्थीलाई पोसाक तथा स्टेशनरी सहयोग गरिएको हो । कार्यक्रममा ग्रुपकी अध्यक्ष राधिका भण्डारी, उपाध्यक्ष सृजना घिमिरे, सहसचिव अंकिता भण्डारी, कोषाध्यक्ष मधुमाया केसी थापा तथा सदस्यहरू शान्ता घिमिरे, मधु अधिकारी, सन्तोसी क्षेत्री, देवी थापा, विनिता थापा, सुजता थापा र सुमि भण्डारीको उपस्थिति रहेको थियो । उनिहरु दुई घण्टा पैदल हिँडेर पोसाक तथा स्टेशनरी वितरण गर्न पुगेका थिए ।
विद्यालयका प्रधानाध्यापक बद्री प्रसाद पौडेलले २०२८ सालमा स्थापना भएको विद्यालयमा पहिले टाढाटाढाबाट विद्यार्थी अध्ययनका लागि आउने गरे पनि हाल बसाइँसराइका कारण चेपाङ र दलित समुदायका १८ जना बालबालिका मात्र अध्ययनरत रहेको जानकारी दिए । उनले कतिपय विद्यार्थी अभिभावकविहीन रहेको उल्लेख गर्दै सहयोग गर्ने बुहारी समूहप्रति आभार व्यक्त गरे ।
सहनशिला बुहारी ग्रुपकी अध्यक्ष राधिका भण्डारीले २०८० सालमा समूह गठन गरिएको बताउँदै फजुल खर्च कटौती गरेर सामाजिक सेवामा लाग्ने उद्देश्यसहित अभियान सुरु गरिएको जानकारी दिइन् । उनका अनुसार समूहका सदस्यहरूले मासिक एक सय रुपैयाँ बचत गर्ने तथा जन्मदिन र वैवाहिक वर्षगाँठमा हुने खर्च कटौती गरेर सहयोग कोष संकलन गर्ने गरेका छन् ।
तीन वर्षको अवधिमा समूहले ३४ औँ सामाजिक सहयोग कार्यक्रम सम्पन्न गरिसकेको अध्यक्ष भण्डारीले बताइन् । गत वर्ष इच्छाकामना गाउँपालिका–१ तिपाङस्थित चेपाङ विद्यालयमा समेत सहयोग गरिएको उनले जानकारी दिइन । महिलाहरूलाई घरभित्र मात्र सीमित गर्ने सोच परिवर्तन गर्न आवश्यक रहेको उल्लेख गर्दै गाउँ–टोलमा यस्ता परोपकारी अभियान विस्तार गर्नुपर्नेमा भण्डारीले जोड दिइन् ।
