राष्ट्रिय स्वतन्त्र पार्टीका (रास्वपा) सभापति रवि लामिछानेको चितवनमा दुई दिन लगाएर बयान सकिएको छ ।
आज कार्यालय समय खुलेसङ्गै प्रहरी हिरासतबाट सरकारी वकिल कार्यालय पुर्याइएका लामिछानेको दोस्रो दिन १० घण्टासम्म बयान लिईएको चितवनका न्यायधिवक्ता शान्तिराज लुँइटेलले नारायणी अनलाइनलाई जानकारी दिए । सहकारीको रकम अपचलन मुद्दामा पक्राउ परेका लामिछानेलाई हिजो मात्रै काठमाडौंबाट ल्याइएको थियो ।
उनलाई यहाँ ल्याउने बित्तिकै पहिलो दिन करिव ५ घण्टा बयान लिईएको थियो । दुई दिनमा रविलाई ७५ वटा प्रश्न गरेर बयान लिईएको स्रोतले जनाएको छ । लामिछानेको बयान सकिए पनि आज जिल्ला प्रहरी कार्यालय चितवनकै हिरासतमा राखिने छ ।
लामिछानेविरुद्ध चितवनको साहारा चितवन बहुउद्देश्य सहकारी संस्थाको बचत रकम हिनामिना गरेको आरोपमा चितवन जिल्ला अदालतले मंसिर ५ गते लामिछानेसहित १० जना विरुद्ध पक्राउ पुर्जी जारी गरेको थियो । साहारा चितवन सहकारीकै रकम हिनामिना अभियोगमा पूर्व डिआइजी छविलाल जोशी र नेचर हव इन्टरनेशनल प्रालिमा आबद्ध रामबहादुर खनाललाई आइतबार र सोमबार बयान लिइएको थियो ।
