खाद्य प्रविधि तथा गुण नियन्त्रण डिभिजन कार्यालय भरतपुरले नक्कली चुक अमिलो बिक्री गर्ने तीन कम्पनीविरुद्ध मुद्दा दायर गरेको छ ।
कार्यालयले सरकारी वकिलमार्फत् हदैसम्मको सजाय माग गर्दै मंसिरमा मुद्दा दर्ता गरेको हो । यसको फैसला आउन बाँकी रहेको कार्यालयले जनाएको छ ।
नक्कली चुक अमिलो बेच्ने कम्पनीहरुमा पहाडी चुक अमिलो खैरहनी नगरपालिका–१, आचार्य फुड्स रत्ननगर नगरपालिका–३ र भरतपुर महानगरपालिका–१० मा बिक्री डिपो रहेको लक्ष्मी चुक अमिलो खैरहनी–१ रहेका छन् ।
खाद्य प्रविधि तथा गुण नियन्त्रण डिभिजन कार्यालय भरतपुरका प्रमुख घननाथ अधिकारीका अनुसार तीनवटा कम्पनीको नमुना संकलन गरी प्रयोगशालामा परीक्षण गर्दा नक्कली चुक अमिलो बनाएको प्रमाणित भएपछि मुद्दा दर्ता गरिएको हो । खाद्य ऐन अनुसार नक्कली खाद्यान्न बेच्नेलाई ५० हजार रुपैयाँसम्म जरिवाना वा पाँच वर्षसम्म कैद वा दुवै सजाय हुने कानुनी व्यवस्था रहेको छ ।
