नेकपा (एमाले) का अध्यक्ष केपी शर्मा ओलीले बढ्ता जान्ने भएर अहंकारले उफ्रिँदा माधवकुमार नेपाल भड्खालामा जाकिन पुगेको बताएका छन् ।
एमाले रौतहटको दसौं जिल्ला अधिवेशनको उद्घाटन गर्दै अध्यक्ष ओलीले एकीकृत समाजवादीका अध्यक्ष नेपाल प्रतिक्रियावादीको पछि लागेर हिँडेको आरोप लगाएका हुन् । रौतहट नेपाल र अर्का नेता प्रभु शाहको गृहजिल्ला भएकोले पनि ओली उनीहरुप्रति बढी आक्रामक बनेका छन् ।
उनले अहिलेको सरकारले देशलाई सर्वत्र अस्तव्यस्त बनाएको बताउँदै भने, ‘जनतालाई कुनै पनि राम्रो, नयाँ काम गरेको छैन । हामीले थालेका विकास–निर्माण र आयोजना अलपत्र बनाएको छ । माधवकुमार नेपाल यतातिर आएर के भन्छन्, हिजोका दिन मैले यसो अनलाइन हेरेको, केपी ओलीसँग बोलचाल बन्द…,’ उनले भने, ‘माधवकुमार नेपालसँग बोलाचाल नहुँदा हाम्रो के बिग्रिन्छ र हँ ? माधव नेपाललाई म सुझाव दिन्छु, रौतहटका जनतासँग पनि बोली बोलाचाल बन्द गरे हुन्छ । अनि के म बोलचाल गरिपाऊँ भनेर निवदेन हाल्न गएको छु ? उहाँका बारेमा केही टिप्पणी गर्नुछैन । कहिलेकाहीँ बढ्ता जान्ने भएर, अहंकारले उफ्रिँदा भड्खालामा जाकिन्छ, कसरी जाकिन्छ भने माधवकुमार नेपाललाई हेरे पुग्छ !’
नेता नेपाल विदेशीको, प्रतिक्रियावादी, पार्टी, जनता, विकास, सुशासन विरोधी, भ्रष्ट तत्वको मतियार भएको बताए । ‘तिनको सहयोगी भएर, तिनको सरकार बनाइदिएर पछिपछि हिँडेका छन् माधवकुमार नेपाल । यो पार्टीले प्रधानमन्त्री बनाएको थियो, अहिले पछिपछि हिँडेका छन्,’ उनले भने । त्यस्तै उनले आम जनता पार्टीका अध्यक्ष प्रभु साहले पनि एमालेलाई धोका दिएको बताए । टिकट आफैंले राखेर एमाले सिध्याउने खेलमा लागेको बताए । माधवकुमार नेपाल र प्रभु साहसँग भ्रमवश गएकाहरूलाई फिर्ता आउन सभामा अध्यक्ष ओलीले अव्हान गरे ।
