प्रतिकूल मौसमका कारण भरतपुर विमानस्थलका उडान प्रभावित भएका छन् ।
तराई क्षेत्रमा लागेको बाक्लो हुस्सुका कारण ‘भिजिबिलिटी’ कमजोर हुँदा त्यस क्षेत्रको हवाई उडान प्रभावित भएको भरतपुर विमानस्थलले जनाएको हो ।
बिहानको उडानको प्रभावित भए पनि दिउँसो १ बजेबाट उडान सुरु भएको विमानस्थलले जनाएको छ । उडान प्रभावित भएसँगै हवाइ यात्रुहरु समस्यामा परेका छन् । बाक्लो हुस्सु\कुहिरोका कारण भरतपुरसहित सिमरा, जनकपुर र भैरहवाको उडान प्रभावित भएका छन् ।
भरतपुर विमानस्थलबाट काठमाडौँ र पोखरा गरी दैनिक १० वटा उडान हुँदै आएका छन् । आकाश खुलेपछि आज दिनभरमा भरतपुर–काठमाडौँ ६ वटा उडान भएका छन् । आज पोखरा उडान रद्द भएको भरतपुर विमानस्थलले जनाएको छ । भरतपुर विमानस्थलमा बिहान ७ बजेबाट साँझ पाँच बजेसम्म उडान हुँदै आएको छ ।
