मकवानपुर, पुस ११
राष्ट्रिय सभा सदस्य पदको निर्वाचनका लागि उम्मेदवार बन्न नेपाली कांग्रेस बागमती प्रदेश समितिले ९१ जनाको नाम सिफारिस गरेको छ । बुधबार कांग्रेस बागमती प्रदेश सभापति बानियाँले राष्ट्रिय सभा सदस्य पदको निर्वाचनका लागि बागमती प्रदेशका १३ जिल्लाबाट ९१ जनाको नाम सिफारिस गरेका हुन् ।
नेपाली कांग्रेस बागमती प्रदेश समितिको कार्य सम्पादन समितिले उम्मेदवार सिफारिसको सम्पूर्ण अधिकार सभापति बानियाँलाई नै दिएको थियो । सोही आधारमा बानियाँले जिल्लाबाट प्राप्त सिफारिसलाई अध्ययन गरी कांग्रेस केन्द्रीय कार्यालयमा सिफारिस गरेका हुन् ।
कांग्रेस बागमती प्रदेशले १० जना केन्द्रीय सदस्यसहित २ जना जिल्ला सभापतिलाई राष्ट्रिय सभा सदस्य पदको उम्मेदवार बनाउन सिफारिस गरेको छ भने ४ जना प्रदेश पदाधिकारी, २ जना जिल्ला सभापति र २ जना राष्ट्रिय व्यक्तित्वसहित ९१ जनालाई राष्ट्रिय सभा सदस्य पदको निर्वाचनमा उम्मेदवार बनाउन सिफारिस गरिएको छ ।
जसमा केन्द्रीय सदस्यहरू दोलखाका जिप छिरिङ लामा, काभ्रेका गणेश लामा, धादिङका दिलमान पाख्रिन, चितवनका टेक प्रसाद गुरुङ रहेका छन् । काठमाडौँकी राधा घले, हरिशरण नेपाली, भक्तपुरका गंगा अवला, मदनकृष्ण श्रेष्ठ, ललितपुरका मदन अमात्य र जितजंग बस्नेत राष्ट्रिय सभा सदस्य पदको उम्मेदवारका लागि कांग्रेस बागमती प्रदेशले सिफारिस गरेको छ ।
प्रदेश पदाधिकारीबाट राष्ट्रिय सभा सदस्य पदमा उम्मेदवारका लागि सिफारिस हुनेमा उपसभापति चन्द्र महर्जन, महासचिव राजु श्रेष्ठ, सहमहामन्त्री जीवन डङ्गोल र हरिशरण श्रेष्ठ रहेका छन् । काठमाडौँका जिल्ला सभापति सबुज बानियाँ र मकवानपुरका सभापति बुद्ध लामा पनि राष्ट्रिय सभा सदस्य पदको उम्मेदवारका लागि प्रदेश समितिले सिफारिस गरेको छ । राष्ट्रिय व्यक्तित्व तर्फ कलाकार निर शाह र पत्रकार तारानाथ दाहाललाई राष्ट्रिय सभा सदस्य पदमा उम्मेदवार बनाउन सिफारिस गरिएको छ ।
आगामी फागुन २० गते एमालेका ९, कांग्रेसका ४ माओवादीका ३, एकीकृत समाजवादीका २, जसपाका १ र स्वतन्त्र सांसद १ जना गरी २० सांसदको पदावधि सकिँदै छ । पदावधि सकिनेमध्ये बागमती प्रदेशबाट ४ जना रहेका छन् । खिमलाल देवकोटा, एमालेबाट रामचन्द्र राई, दिल कुमारी रावल थापा ‘पार्वती’, र एकीकृत समाजवादीबाट सिंग बहादुर विश्वकर्माको पदावधि फागुन २० मा सकिने भएको हो ।
उक्त पदहरूमा आगामी माघ ११ मा राष्ट्रिय सभा सदस्यका १९ पदमा निर्वाचन हुँदैछ । निर्वाचन आयोगले राष्ट्रिय सभाका निर्वाचनको कार्यतालिका समेत सार्वजनिक गरेपछि राजनीतिक दलहरू आन्तरिक तयारीमा जुटेको छ ।
